Lajme

Vodhën mbi 30 mijë euro në një market në Viti, iu caktohet paraburgimi 5 personave

Autori: Gazeta inFokus 11:30 | 29 November 2023

Gjykata Themelore në Gjilan ia ka caktuar masën e paraburgimit pesë personave, pasi dyshohet se më 1 qershor në Viti kanë kryer një vjedhje në një market.

Sipas gjykatës, të pandehurit M.B., G.S., A.M., M.M. dhe Z.M., me përgatitje paraprake dhe planifikim të veprimeve kanë shkuar në një market në rrugën “Dëshmorët e Kombit” në Viti, ku në brendi dhe zyre të marketit kanë vjedhur 28 mijë euro.

“Të njëjtit kanë shkuar në marketin e lartcekur, ashtu që fillimisht të pandehurit M. B. dhe G. S. hapin me forcë dyert e marketit, depërtojnë në brendi dhe në zyre të marketit marrin shumë prej 28.000€, e më pas largohen në drejtim të parkingut ku ishin duke i pritur të pandehurit M.M., A.M. dhe Z.M., të cilët ishin duke e siguruar terrenin”, thuhet në njoftimin e gjykatës.

-Advertisement-

Më tej, gjykata bëri të ditur se më 5 nëntor të këtij viti, pesë të pandehurit, në marketin e njëjtë kanë kryer një tjetër grabitje në vlerë prej 2 mijë e 500 euro.

“Me përgatitje paraprake dhe duke i ndarë rolet, ashtu që të pandehurit M. B. dhe G. S., të maskuar e me përdorim të forcës apo kanosjes serioze duke mbajtur armë në dorë, ndaj të dëmtuarit H. H., ashtu që derisa i dëmtuari i kishte mbyllur dyert kryesore të marketit, të pandehuri i dalin para, në afërsi të marketit, në errësirë me ngjitës i’a mbyllin gojën të njëjtit e më pas me forcë hapin dyert e marketit, depërtojnë në brendësi dhe aty marrin shumë prej 2500 €, e më pas dalin nga marketi dhe bëhen bashkë me të pandehurit M.M, A.M. dhe Z.M. të cilit ishin duke i pritur me veturë”, thuhet tutje në njoftim.

Sipas gjykatës, me këto veprime, të pandehurit kanë kryer veprat penale “vjedhje e rëndë” dhe grabitje”, ndërsa bëhet e ditur se gjyqtari i procedurës paraprake ka vlerësuar se qëndrojnë arsyet ligjore për caktimin e paraburgimit ndaj të pandehurve.

Subscribe në YouTube: GAZETA INFOKUSI