Lajme

Veseli për VV-në: Pesë vite janë munduar të shkulin edhe shtetin për të ardhur në pushtet

Autori: Gazeta inFokus 21:47 | 10 December 2019

Kryetari i PDK-së, Kadri Veseli, pas intervistimit në Dhomat e Specializuara, nga Haga ka dhënë një intervistë për emisionin “Debat Plus” në RTV Dukagjini.

Veseli ka thënë se ka qenë korrekt ndaj Hagës duke iu përgjigjur ftesës për intervistim, duke thënë se ka përfunduar për atë që është ftuar.

“Dua të jem korrekt të mos bëj deklarata publike, pasi jam edhe politikan”, ka thënë Veseli, duke qenë i rezervuar nga ajo që është pyetur në Hagë, përcjell Telegrafi.

Kryetari i PDK-së ka thënë se historia do të tregojë nëse ishte i drejtë themelimi i Gjykatës Speciale, por sipas tij historia tregon se krime në Kosovë ka bërë Serbia.

Veseli ka thënë se e sheh si zhvillim pozitiv edhe ndryshimet politike që kanë ndodhur pas zgjedhjeve parlamentare “në kuptimin që do të vërtetohen disa çështje se a ka pasur artificializma dhe manipulime në realitetet në të cilat kemi kaluar”.

Ai ka thënë se kjo shoqëri duhet të shkojë para, por sipas tij “jo me urrejtje, papjekuri e emocione”.

“Shumë shpejt do të shihet e vërteta dhe drejtimi të cilin duhet të shkojmë”.

Sipas tij, prej pesë vitesh sa ai ka qenë në krye të Kuvendit “ata janë munduar të shkulin edhe shtetin për të ardhur në pushtet. Të shohim tani a po ndryshojnë rrënjësisht për ato që janë trumpetuar”.

I pari i PDK-së ka përmendur edhe takimin e Gjuriqit me zyrtarët e Kosovës.

Ai ka thënë se sa më shumë të këtë populizma brenda Kosovës “krokodili Vuçiq do të forcohet”.

“Po përse të mos mohojë Vuçiqi masakrën e Reçakut, kur ai mohon masakrën ai tjetri shkon takohet në Tiranë”, tha Veseli.

Të tjera