Sot shënohet 23-vjetori i çlirimit të Kosovës nga okupatori serb, mirëpo krerët e UÇK-së, asaj që ndihmoi në arritjen e lirisë, po akuzohen për krime lufte në Gjykatën Speciale në Hagë. Një ndër ta është edhe ish-zëdhënësi i Ushtrisë Çlirimtare të Kosovës, Jakup Krasniqi.

Vajza e Jakup Krasniqit, Gresa, ka ndarë një postim në Facebook, ku e ka pyetur babain e saj se a duhet të festojmë sot pasi që është Dita e Çlirimit.

Ajo ka thënë se sot e gëzojnë lirinë ata që nuk deshtën të largohen nga robëria dhe vuajnë ata që i dhanë fund Serbisë fashiste.

“Shoh fëmijë të dëshmorëve të harruar, e veteran të një lufte të eger, të poshtruar nga institucionet e shtetit, të cilit i falën gjithçka”, ka shkruar Krasniqi.

Gresa, poashtu, ka pyetur se a jemi të çliruar kur çlirimtarët po ‘mbahen padrejtësisht në qendër të paraburgimit ndërsa gjykimi po zvarritet”.

Ajo ka kritikuar edhe qeveritarët se nuk po i përkushtohen mjaftueshëm të paraburgosurve në Hagë. Gresa ka thënë se kryeministri i Kosovës në SHBA ka amnistuar krahun e djathtë të Millosheviqit, Vuçiqin, ndërsa për Jakup Krasniqin nuk ka folur asnjë fjalë.

“Kryeministri i Republikës së Kosovës në mes të SHBA-së amniston krahun e djatht të Millosheviçit, Vuçiçin ndërsa për homolgun e atëhershëm të tij në Kosovë, Jakup Krasniqin, asnjë fjalë!”, ka shkruar ajo.

E bija e ish-zëdhënësit të UÇK-së tha se ministrja Haxhiu nuk e ka ndjekur seancën ndaj Hysni Gucatit e Nasim Haradinajt.

“Dy nga drejtuesit e OVL-së së UÇK-së në emër të popullit të Kosovës u dënuan, ndërsa ende nuk ka asnjë hetim të brendshëm se si dolën dokumentet nga zyra e Prokurorisë së Specializuar në Hagë dhe arritën deri tek zyra e OVL-së së UÇK-së në Prishtinë. Dita e çlirimit sot, por seancen gjyqësore ndaj Hysni Gucatit dhe Nasim Haradinajt që e ndoqën shumë shqiptarë kudo nëpër botë, nuk e ndoqi ministrja e Drejtësisë”, ka shkruar Krasniqi.

Ajo tha se institucionet e Kosovës kanë heshtur për këtë çështje, mirëpo nuk kanë heshtur për luftën në Ukrainë

“Heshtje nga institucionet e Kosovës të cilët, megjithatë, nuk heshtën për luftën e Ukrainës ani pse asnjëherë nuk e lartësuan luftën e UÇK-së.”

“Lavdi të rënëve që dhanë gjithçka për lirinë që sot gëzojmë dhe nderime deri në përulje juve pak të gjallëve që i dhat shumëçka këtij vendi! Babi uroj dhe shpresoj që shumë shpejt, bashkë ta gëzojmë lirinë!”, ka përfunduar ajo.

EURO 2024 dhe Serie A, dy ekskluzivitetet absolute të Artmotion këtë vit

Sponsoruar