Kulturë

Tuma 700-vjeçare e Kamenicës, gati për vizitorët e sezonit të ri turistik

Autori: Gazeta inFokus 10:22 | 27 March 2025

Specialistët e Drejtorisë Rajonale të Trashëgimisë Kulturore Korçë po kryejnë punime në objektin Tuma e Kamenicës, një prej destinacioneve më të vizituara në qytetin e Korçës.

DRTK Korçë i konsideron këto punime si një hap të rëndësishëm për ruajtjen dhe promovimin e këtij siti duke e bërë atë sa më të aksesueshëm për vizitorët që edhe për këtë sezon pritet të jenë të shumtë.

Tuma e Kamenicës gjendet rreth 15 km larg Korçës dhe konsiderohet si një ndër sitet arkeologjike më të rëndësishme në Ballkan. Siti po i nënshtrohet punimeve të mirëmbajtjes për të garantuar ruajtjen e kësaj trashëgimie për brezat e ardhshëm.

-Advertisement-

Ndërhyrjet konsistojnë në: Zëvendësim dhe restaurim të gardhit; Restaurimin e portës hyrëse dhe të ambienteve ndihmëse; Restaurim të pergolatës; Pastrim të sitit arkeologjik nga bimësia.

Në këtë vendvarrim prehistorik janë evidentuar varre, skelete kockore, objekte arkeologjike si qeramikë, armë, stoli prej bronzi, hekuri, argjendi, ari, qelibari dhe kocke. Kjo tumë është më e madhja e gjetur jo vetëm në Shqipëri, por në Ballkan. Varret më të hershëm të saj i përkasin periudhës së Bronzit të Vonë, rreth shek. XII para Krishtit. Kjo tumë ka një histori gati 700-vjeçare.