Pas 14 ditësh kërkime, ekipi i FSK-së, arriti të gjejë trupin e pajetë të 82-vjeçarit, Mustafë Haxhiat, i cili ishte hedhur në lumin Erenik të Gjakovës. Familjarët nuk kanë kërkuar të bëhet obduksoni. Varrimi i të ndjerit pritet të bëhet nesër.
Vdekja e babait e kishte trishtuar pa masë. Mirëpo, dhimbja dhe mërzia e të birit dhe e gjithë familjes veçse u shtua për ditë me radhë pasi nuk mund ta gjenin trupin e pajetë që ta varrosnin.

Më fund, pas 14 ditësh kërkime, ekipi i FSK-së, arriti të gjejë trupin e pajetë të 82-vjeçarit, Mustafë Haxhiat, i cili ishte vetëhedhur në lumin Erenik të Gjakovës, duke i dhënë fund jetës së tij.

Një orë pas gjetjes së trupit të pajetë të babait të tij, Fatmiri tregon për Express mërzinë e tij dhe të të gjithë familjes.

“Krejt ato mërzia e çështje tjera emocionale normalisht që janë gjendje e vështirë. Kjo ishte diçka e rëndë për ne, për familjen, na humbi edhe trupi i tij se për vdekjen do të pajtohemi nuk kemi çfarë të bëjmë”, shprehet ai.

Trupi i të ndjerit tashmë është dërguar në morg. Sidoqoftë, nuk do të bëhet obduksioni, pasi kjo nuk është parë e nevojshme nga familjarët.

“Obduksion nuk do të bëjmë pasi nuk dyshojmë në asgjë dhe askënd, ai e ka bërë pa vetëdije apo ku e dimë qëllimin e tij, kështu që nuk asgjë të dyshimtë dhe nuk kemi dashur të dëmtohet trupi i babait pa nevojë”, tha më tej Fatmiri.

Pas një pune intensive, edhe përkundër terrenit të papërshtatshëm, sot rreth orës 11:50, ekipi i FSK-së ka arritur të nxjerrë nga uji trupin e pajetë të Mustafë Haxhisë.

Lajmin për Express e ka konfirmuar edhe zëdhënësja e Policisë në rajonin e Gjakovës, Lirije Podrimaj.

“Pas një pune intensive sot me datën 19.01.2018 në ora 11:50 ekipi i FSK-së arriti të nxjerrë nga uji trupin e pajetë të personit të viktimës M. H., kosovar/ shqiptar i moshës 82 vjeçar nga Gjakova, trupi i të ndjerit është gjetur përafërsisht rreth dy kilometra nga vendi i ngjarjes. Njësitet e FSK-së nuk pushuan së kërkuari në asnjë moment për 14 ditë rresht , të përkrahur kohë pas kohe edhe nga njësiti i zhytësve nga Mitrovica dhe ekipi i zjarrfikësve nga Gjakova edhe përkundër terrenit të pa përshtatshëm dhe vështirësive tjera”, ka thënë Lirie Hajdari.

Varrimi i të ndjerit pritet të bëhet nesër, derisa të vinë disa të afërm të tij në Kosovë.

Mustafë Haxhia që nga lufta kohë pas kohe ka vuajtur nga depresion dhe për një kohë të gjatë ka qenë me terapi. Më pesë janar 2018 në orën 16:35, stacioni policor në Gjakovë kishte marrë një informatë se 82-vjeçari kishte kërcyer nga ura që lidh pjesën e qytetit me fshatin Moglicë dhe ishte hedhur në lumin Erenik.

BKT Kosova vlerësohet për herë të katërt "Banka e Vitit 2024 në Kosovë" nga The Banker

Sponsoruar