Agjentët e shërbimit sekret dyshohet se rrahën Nikola Sanduloviçin pasi ai kërkoi falje për krimet kundër shqiptarëve etnikë.

Familja e një lideri të opozitës serbe, i cili dyshohet se u rrah derisa ishte në paraburgim nga shërbimi sekret i vendit, thotë se ai ka mbetur pjesërisht i paralizuar nga sulmi, ka shkruar sot gazeta britanike “The Guardian” për rastin e Sanduloviqit në Serbi – lajm i cili kryeson ballinën e mediumit.

Në një sulm që ka nxitur frikën për të ardhmen e demokracisë në vend, familja e Nikola Sanduloviq thotë se ai u mor nga shtëpia e tij më 3 janar pasi kërkoi falje për krimet e kryera nga serbët kundër shqiptarëve etnikë gjatë luftës së Kosovës për pavarësi në vitin 1998 dhe 1999.

Të mërkurën, pas vizitës së parë familjare të lejuar për pesë ditë, vajza e Sanduloviqit, Karla, bëri thirrje që babai i saj të transferohej në një spital civil nga objekti ushtarak në Beograd në të cilin po mbahej.

“Ai është i komunikativ, por është plotësisht i paralizuar në anën e djathtë; në një karrige me rrota dhe në një gjendje shumë të keqe shëndetësore”, tha ajo në një deklaratë të lëshuar përmes Michael Polak, avokat në Mbretërinë e Bashkuar dhe drejtor i Drejtësisë Jashtë vendit, i cili po punon për politikanin.

Familja beson se Sanduloviq, lideri i partisë Republikane Serbe dhe kritik i rregullt i Partisë Progresive Serbe (SNS), mund të jetë “helmuar”, shtoi ajo. Avokatët kanë thënë se nuk mund të verifikojnë asgjë në lidhje me shëndetin e Sanduloviqit apo sulmin derisa ta çojnë atë në një objekt civil ku ka qasje të plotë tek mjekët dhe avokatët.

Polak ka paraqitur me urgjencë rastin pranë Komitetit të OKB-së Kundër Torturës duke kërkuar zyrtarisht një masë të tillë. Ai ka thënë se Sanduloviq ishte “kapur nga shërbimi i inteligjencës serbe dhe më pas u arrestua dhe u torturua në mënyrë arbitrare”.

The Guardian i është drejtuar për komentim qeverisë serbe, transmeton Gazeta Express.

Sanduloviq u kritikua ashpër në mediat shtetërore pasi ripostoi një video të vitit të kaluar në të cilën ai vizitoi varrin e Adem Jasharit, themeluesit të Ushtrisë Çlirimtare të Kosovës, i cili u vra nga policia serbe në vitin 1998 së bashku me 57 anëtarë të familjes së tij gjatë luftës së Kosovës për pavarësi.

Në kohën kur bëri vizitën, në shkurt 2023, Sanduloviq kërkoi falje për vdekjet. Ai e ripostoi videon së bashku me një tjetër falje në dy javët e fundit duke shkaktuar kritika nga disa media lokale.

“Unë jam i vetmi politikan nga Serbia që kam ardhur për të nderuar viktimat e pafajshme shqiptare, familjen Jashari në Prekaz. Unë kërkova falje – dhe kërkova falje në emër të serbëve që nuk e bënë këtë”, shkroi Sanduloviq në X më 2 janar.

“Ai ishte rrahur keq. Ai ka një brinjë të thyer. Kur u kthye në shtëpi herë i vinte vetëdija herë jo dhe ankohej se nuk mund të lëvizte anën e djathtë të trupit”, tha Polak.

Pavarësisht kësaj, Sandulovićqu arrestua një ditë pasi u kthye në shtëpinë e tij nga policia serbe dhe nuk u pa nga familja e tij deri të mërkurën në mëngjes.

Një gjykatës urdhëroi që ai të mbahej në paraburgim për 30 ditë pasi u akuzua, në mungesë, për gjoja nxitje të urrejtjes kombëtare, racore dhe fetare, një vepër kjo sipas nenit 317 të kodit penal të sjelljes që mund të dënohet me burg nga gjashtë muaj deri në pesë vjet.

Polak thotë se akuza është një shkelje e qartë e konventës eropiane mbi të drejtat e njeriut që mbron fjalën politike.

Sulmi do të ngrejë pyetje të reja në lidhje me qëllimin e deklaruar të Serbisë për t’u bashkuar me BE-në dhe do të nxisë frikën për marrëdhëniet e saj me vendet fqinje, përfshirë Kosovën. Kjo vjen mes akuzave se zgjedhjet e fundit ishin manipuluar në favor të SNS të presidentit Aleksandar Vuçiq, një akuzë që Vuçiq e mohon.

Duke pranuar tensionin në rritje politik të Serbisë, Polak megjithatë i kërkoi komunitetit ndërkombëtar të dënojë sulmin ndaj klientit të tij.

“Fjala politike të jetë shumë e mbrojtur. Pa lejimin e fjalës politike ju dëmtoni funksionimin e demokracisë. Mendoj se është një rast shumë i rëndësishëm për të gjithë popullin serb, pavarësisht nëse pajtohen me gjestin e Sanduloviqit apo jo”, tha ai.

Në një deklaratë të mërkurën, Komisioni Europian tha se ishte “në kontakt me autoritetet përkatëse dhe palët e interesuara”. Çdo ndalim duhej të justifikohej ligjërisht dhe “çdo pretendim i besueshëm për dhunë duhet të ndiqet në mënyrë efektive nga autoritetet kompetente përkatëse”, shtoi KE.

BKT Kosova vazhdon përkushtimin ndaj gjithëpërfshirjes duke dhuruar një furgon për të mbështetur fëmijët me nevoja të veçanta

Sponsoruar