Ambasadori i Bashkimit Evropian në Kosovë, Tomas Szunyog, ka marrë pjesë sot në disa aktivitete të zhvilluara për Ditën e Evropës.

Me këtë rast, ai ka thënë se viti i kaluar ka sjellë përparime për Kosovën dhe se dialogu për normalizim marrëdhëniesh me Serbinë duhet të vazhdojë.

“Bashkimi Evropian nuk është vetëm një bashkim politik dhe ekonomik. Është një projekt për ndërtimin e paqes, i krijuar pas Luftës së Dytë Botërore, me qëllim promovimin e paqes, stabilitetit dhe prosperitetit në Evropë”.

Në Ballkanin Perëndimor, sipas tij, BE-ja luan një rol vendimtar në promovimin e dialogut dhe pajtimit, veçanërisht ndërmjet Kosovës dhe Serbisë.

“Është parësore që negociatat për normalizimin e marrëdhënieve ndërmjet të dyja palëve të vazhdojnë nën patronazhin e dialogut të lehtësuar nga BE-ja dhe që dialogu të sjellë zgjidhje të qëndrueshme për të mirën e popullatës në terren, të gjitha duke ndërtuar ura midis komuniteteve”, shtoi ai.

Tutje, ai ka shtuar se edhe pse sfidues, viti i kaluar solli disa përparime, duke përfshirë udhëtimin pa viza për kosovarët në zonën Shengen që nga 1 janari 2024.

“Çështja e pazgjidhur e liberalizimit të vizave ka qenë një re e errët mbi marrëdhëniet BE-Kosovë për dekadën e fundit dhe më jep gëzim të madh të them se që nga 1 janari 2024, kosovarët nuk do të kenë më nevojë për viza për vizita turistike afatshkurtra në zonën Shengen”, vuri në dukje Szunyog, duke falënderuar Presidencën çeke dhe suedeze të Këshillit të Bashkimit Evropian për kontributin e tyre në këtë drejtim.

Sipas tij, një tjetër arritje e madhe janë tre marrëveshjet e financimit të IPA-s të nënshkruara ndërmjet BE-së dhe Kosovës, duke përfshirë Paketën e Mbështetjes së Energjisë, duke rezultuar në sigurimin e BE-së për Kosovën më shumë se 200 milionë euro si ndihmë direkte financiare.

“Ndihma e përgjithshme financiare e BE-së që ofron për Kosovën në kuadër të IPA-s, gjegjësisht Instrumentit të Asistencës së Para-Aderimit të BE-së, nga viti 2007 deri më sot, ka kaluar 1.4 miliardë euro. Ai po përdoret për të ndihmuar Kosovën, ndër të tjera, për të zhvilluar ekonominë dhe infrastrukturën e saj, për të përmirësuar arsimin dhe mbrojtjen e mjedisit dhe përafrimin e legjislacionit të saj me acquis të BE-së”, tha Szunyog, njofton Klan Kosova.

“Edhe ndihma jonë financiare dhe mbështetja e ekspertëve janë të orientuara drejt avancimit të Kosovës në rrugën e saj të integrimit në BE. Shpresoj që deri në Ditën e Evropës të vitit të ardhshëm, të kemi një zhvillim edhe më pozitiv për të festuar”, përfundoi ai duke i uruar të gjithëve Gëzuar Ditën e Evropës.

UFC EKSKLUZIVISHT NË ARTMOTION!

Sponsoruar