Sulmi ndaj Kapitolit, komisioni tërheq fletëthirrjen për dëshmi drejtuar ish-presidentit Trump
Autori: Gazeta inFokus 21:29 | 29 December 2022
Komisioni i Dhomës së Përfaqësuesve që hetoi sulmin e dhunshëm ndaj Kapitolit më 6 janar ka hequr dorë nga fletëthirrja drejtuar ish-presidentit Donald Trump për të dëshmuar. Ky hap vjen ndërsa komisioni ka përfunduar punën dhe po përgatitet të shpërndahet javën e ardhshme.
Ligjvënësi demokrat Bennie Thompson, në cilësinë e kryetarit të komisionit, i shkroi të mërkurën një letër avokatit të zotit Trump, David Warrington, ku e njoftonte rreth vendimit.
“Siç mund ta dini, Komisioni ka përfunduar seancat dëgjimore, ka publikuar raportin përfundimtar dhe puna e tij shumë shpejt po shkon drejt fundit”, shkruante zoti Thompson. “Ndaj Komisioni nuk mund të ndjekë informacionin specifik që do të sigurohej nëpërmjet kësaj fletëthirrjeje”.
Gjatë seancës së tij të fundit që u mbajt përpara zgjedhjeve për Kongresin, në tetor, Komisioni votoi për thirrjen zyrtarisht për të dëshmuar të zotit Trump. Ligjvënësit kërkuan gjithashtu dokumente nga ish-presidenti, ndërsa kishin hetuar rolin e tij në sulmin e dhunshëm ndaj Kapitolit më 6 janar të vitit 2021, si dhe përpjekjet për të përmbysur rezultatin e zgjedhjeve të vitit 2020.
Ligjvënësit në komision kanë pranuar se sigurimi i dëshmisë do të ishte diçka e vështirë për t’u arritur, kjo nisur dhe nga fakti që në janar kontrolli i Dhomës së Përfaqësuesve do të kalonte në duart e republikanëve. Por vendimi i komisionit në atë kohë dukej se kishte më shumë një vlerë politike dhe simbolike.
“Ne jemi të detyruar të kërkojmë përgjigje drejtpërdrejt nga njeriu që e vuri në lëvizje gjithë këtë gjë”, tha gjatë seancës së fundit ligjvënësja Liz Cheney, nënkryetare e komisionit dhe një nga dy republikanët e komisionit prej nëntë anëtarësh. “Çdo amerikan ka të drejtë t’i dëgjojë këto përgjigje”.
Por zoti Trump paditi në muajin nëntor komisionin duke e refuzuar dëshminë. Në padinë e tij ai shprehej se në të kaluarën ish-presidentët kanë pranuar vullnetarisht të japin dëshmi ose dokumente në përgjigje të thirrjeve të Kongresit, por “asnjë president apo ish-president, nuk është detyruar ndonjëherë ta bëjë një gjë të tillë”.
Ligjvënësit i kërkuan ish-presidentit t’u vinte në dispozicion komunikimet personale të tij me anëtarë të Kongresit, si dhe përfaqësues të grupeve ekstremiste. Avokatët e zotit Trump thanë se ajo ishte një kërkesë e gjerë dhe e cilësuan atë si shkelje, bazuar në amendamentit e parë të kushtetutës.
Pavarësisht se komisionit nuk siguroi dot dëshminë e ish-presidentit ai intervistoi më shumë se 1000 dëshmitarë, si dhe shumicën e ndihmësve dhe aleatëve më të afërt të zotit në Shtëpinë e Bardhë. Shumë dëshmitarë dhanë detaje thelbësore në lidhje me përpjekjet e tij për të ndikuar zyrtarë federalë e shtetërorë si dhe ligjvënës, në përpjekjet për të përmbysur rezultatin. Ndihmësit e Shtëpisë së Bardhë, që ishin me zotin Trump më 6 janar, dëshmuan para komisionit mbi rezistencën që bëri ish-presidenti për t’i kërkuar turmës së dhunshme të mbështetësve të tij, që të largoheshin nga Kapitoli.
Në raportin përfundimtar të lëshuar javën e kaluar, komisioni doli në përfundimin se zoti Trump u angazhua në një “komplot shumëplanësh për të ndryshuar rezultatin e zgjedhjeve të vitit 2020 dhe se nuk veproi ndaj dhunës”. Komisioni rekomandoi gjithashtu që Departamenti i Drejtësisë të hetojë ish-presidentin për katër krime të veçanta, veprën penale për mbështetjen e një rebelimi.
Të mërkurën në mbrëmje në një postim në mediat sociale zoti Trump dhe avokatët e tij e interpretuan këtë veprim të komisionit si fitore. “Ata ndoshta e bënë këtë sepse e dinin që unë nuk bërë asgjë të keqe, ose sepse do të humbisnin në gjykatë”, shkruante zoti Trump. Ai i quajti anëtarët e komisionit “banditë politikë”.
Në Twitter, avokati i zotit Trump, Harmeet Dhillon shkruante se komisioni kishte “valëvitur flamurin e dorëzimit” siç dhe e cilësoi ai./VOA
Të tjera
-
UP hap konkurs për zgjedhjen e rektorit të ri
Këshilli Drejtues i Universitetit të Prishtinës ka hapur konkurs për zgjedhje...
-
Hoti ia numëron të bëmat tri vjeçare Kurtit: E ka kurthuar Kosovën në marrëveshje pa njohje, e liroi Serbinë nga ky kusht
Ish-kryeministri i Kosovës, Avdullah Hoti, ka reaguar pasi kryeministri Albin...
-
Bie kërkesa e aplikimit për dokumente, Agjencia e Regjistrimit Civil kthehet në orarin e zakonshëm
Ministria e Punëve të Brendshme të Kosovës ka njoftuar se Agjencia e Regjistr...
-
Ministri Maqedonci thotë se do vazhdojë investimin në Forcën e Sigurisë së Kosovës
Në margjina të forumit “Defense 24”, që u mbajt në Poloni, ministri i Mbrojtj...
-
Bashkëshortja i del në krah Hysen Durmishit: Ushtari i vërtetë mbetet i tillë gjithë jetën
Mirjeta Durmishi, bashkëshortja e zëvendësministrit Hysen Durmishi, ka dalë m...
-
Kurti për çështjen e dinarit: Guvernatori i BQK-së nuk më raporton mua, por Kuvendit
Kryeministri i Kosovës, Albin Kurti, tha sot se ka pasur përpjekje të vazhdue...
-
Zgjedhjet në Maqedoninë e Veriut, Osmani: Sonte do të mund të vazhdojmë rrugëtimin drejt BE-së
Kandidati për president nga radhët Frontit Evropian në Maqedoninë e Veriut, B...
-
Haradinaj në Gjakovë, lavdëron punën e Ardian Gjinit
Kryetari i Aleancës për Ardhmërinë e Kosovës (AAK), Ramush Haradinaj, ka vizi...
-
Berisha pasi Kurti tha publikisht se Asociacioni është kusht për KiE: Kosova për të është instrument për planet personale
Ish-zv.ministri i Jashtëm i Kosovës, Anton Berisha ka kritikuar kryeministrin...
-
Anëtarësimi në KiE në pikëpyetje, Kurti: S’e mendonim që pengesë do të bëheshin shtetet demokratike, përkrahëse të Kosovës
Fillimisht e përmendi “votimin e fuqishëm” në Asamblenë Parlamentare të Këshi...
-
Varrosẻt Alma Arrazi gruaja që u hodh në lumin Buna me fëmijë
Është përcjellë në banesën e fundit Alma Arrazi, gruaja që u hodh në lumi...
-
Kurti bën homazhe në Saradran të Istogut: Gjaku i tyre nuk shlyhet kurrë
Kryeministri i Kosovës, Albin Kurti, mëngjesin e sotëm në 25 vjetorin e masak...