Lajme

Srpska alarmon ndërkombëtarët: Prokuroria Speciale po i ndjek 70 qytetarë tanë

Autori: Gazeta inFokus 23:34 | 25 April 2022

Kryetari i Listës Serbe, Goran Rakiq, ka njoftuar sot se po priten akuza nga Prokuroria Speciale për serbë të veriut. Ai tha se këto do të përballen me mosbindje totale civile dhe se Lista Serbe do të bëjë gjithçka që mundet për të mbrojtur njerëzit e saj.

Rakiq theksoi se sot janë mbajtur takime urgjente me përfaqësuesit ndërkombëtarë dhe se arsyeja e këtyre takimeve ka qenë fillimi i procedurës kundër serbëve në Kosovë dhe se aktualisht janë duke u zhvilluar procedura kundër më shumë se 70 serbëve.

“Prokuroria Speciale e Kosovës ka iniciuar procedura ndaj qytetarëve tanë, biznesmenëve, kryetarëve të komunave, deputetëve, përfaqësuesve politikë për atë që Prishtina pretendon se është sulm ndaj rendit kushtetues të Kosovës. Arsyeja ishte protesta kundër lëvizjeve të njëanshme të Prishtinës vitin e kaluar. Persekutim i motivuar i popullit tonë. Sipas informacioneve që kemi, kjo është një procedurë ndaj më shumë se 70 qytetarëve tanë”, tha Rakiq.

Ai thekson se kjo është një procedurë politike në të cilën Kosova paraprakisht i ka dënuar serbët e akuzuar.

“Prandaj askush nga qytetarët tanë, biznesmenët, përfaqësuesit politikë, nuk duhet ta pranojnë këtë ftesë, as t’i përgjigjen asaj. Loja perfide e Prishtinës shihet përmes qëllimit për të krijuar përçarje mes nesh. Lista e tyre nuk është përfundimtare, ndaj i ftoj që të më vënë atë listë mua, Igorin, Sllavkon, Miloviqin, sepse ne kemi qenë në ato protesta me njerëzit tanë dhe do të jemi gjithmonë”, thotë Rakiq.

Rakiq përsëriti se serbët në Kosovë duan të ruajnë paqen, por edhe qëndrimi tolerant i serbëve ka një kufi.

“Nëse Prishtina fillon me lëvizje të njëanshme, Zoti na ruajt, duke arrestuar qytetarët tanë, ne do të detyrohemi t’i rezistojmë me të gjitha mjetet demokratike dhe jodemokratike, që përfshin mosbindje totale civile për të mbrojtur të drejtat e njeriut të qytetarëve tanë”, tha Rakiq.

Siç ka deklaruar ai sot, liderët e Listës Serbe i kanë njoftuar ambasadorët e Quint, por edhe përfaqësuesit e Bashkimit Evropian dhe kanë kërkuar që, siç tha ai, ta frenojnë autoritet e Ksooves për të mos shkaktuar kaos në veri të Kosovës.

“Ne mbështesim shtetin e së drejtës, por kjo nuk është shtet i së drejtës, por dhunë institucionale që persekuton popullin tonë. Ne i bëjmë thirrje qytetarëve për unitet, kjo nuk është çështje politike, por çështje e mbijetesës sonë“, përfundoi Rakiq.

Të tjera