Lajme

Spanca: AKP-ja ka dështuar ta ruajë vlerën e pronave dhe aseteve, ka së paku 800 mijë euro humbje

Autori: Gazeta inFokus 13:01 | 01 February 2023

Auditorja e Përgjithshme e Zyrës Kombëtare të Auditimit (ZKA), Vlora Spanca, ka bërë të ditur se janë dorëzuar në Kuvend dy raportet e auditimit për të Hyrat nga qiraja në Agjencinë Kosovare të Privatizimit për periudhën 2012 – 2021 dhe funksionimin e sistemit të Grantit të përformancës komunale dhe menaxhimi i projekteve të financuara nga donatorët për vitin 2021.

Nga këto raporte, Spanca ka thënë se rreth 41% e mostrave të testuara kanë rezultuar me parregullsi dhe vlera potenciale e humbjes nga këto raste të testuara është mbi 800 mijë euro, mirëpo kjo vlerë, sipas saj, mund të jetë edhe më e lartë.

Ajo ka thënë se AKP ka dështuar të ruajë dhe të rrisë vlerën e pronave dhe aseteve të dhëna me qira të cilat ishin nën administrimin e saj.

-Advertisement-

“Bazuar në atë çfarë kemi gjetur, konkluzioni i auditimit është se Agjencia Kosovare e Privatizimit ka dështuar të ruajë dhe të rrisë vlerën e pronave dhe aseteve të dhëna me qira të cilat ishin nën administrimin e saj.”

LEXO EDHE: Vazhdojnë punësimet masive në AKP-në, që Albin Kurti premtoi se do ta mbyllte

“ZKA ka gjetur se rreth 41% e mostrave të testuara kanë rezultuar me parregullsi dhe vlera potenciale e humbjes nga këto raste të testuara është mbi 800 mijë euro. Duhet theksuar se kjo humbje potenciale është vetëm duke ju referuar vlerës së kontratave të Agjencisë, përndryshe humbja mund të jetë edhe më e lartë sikur të merrej për bazë vlera e çmimit të tregut për qiratë e pronave në zona të ngjashme”, ka thënë tutje ajo.

“ZKA vlerëson se masa të shpejta rigoroze kërkohet të ndërmerren për të përmirësuar proceset e dhënies më qira të pronave të administruara nga Agjencia Kosovare e Privatizimit. Gjithashtu, edhe komunat duhet të ndërmarrin veprime për të përmirësuar menaxhimin e granteve të donatorëve”, raporton EO, transmeton Klankosova.tv.

“Për sa i përket auditimit për ‘Të hyrat nga qiraja në Agjencinë Kosovare të Privatizimit’, objektivi i këtij auditimi ishte të vlerësohet nëse Agjencia ka menaxhuar si duhet pronat dhe asetet tjera të dhëna me qira në përputhje me legjislacionin në fuqi. Ky auditim përfshinë procesin e dhënies së pronave dhe aseteve me qira për periudhën 2012 deri në vitin 2021 dhe ishte bërë më kërkesë të Kuvendit të Kosovës, përkatësisht Komisionit për Buxhet, Punë dhe Transfere, e adresuar nga Komisioni për Mbikëqyrje të Financave Publike dhe e miratuar nga ana ime si Auditore e Përgjithshme”, u shpreh Spanca.

LEXO EDHE: Albin Kurti shpërblen bordin e menaxhmentin e AKP-së me 800 mijë euro për paga e mëditje

Subscribe në YouTube: GAZETA INFOKUSI