Lajme

Sot hiqet çadra: Ja si e pritën Bashën pas marrëveshjes (VIDEO)

Autori: Gazeta inFokus 10:41 | 18 May 2017

Dita e sotme do të jetë vendimtare për të finalizuar dhe detajuar marrëveshjen e një nate më parë mes dy liderve kryesorë politikë, Edi Ramës dhe Lulzim Bashës.

Pas detajimit të marrëveshjes, pritet të mbyllet edhe çadra e protestës së opozitës, pas tre muaj qëndrese si dhe nisja e përgatitjes për zgjedhjet e ardhshme parlamentare.

Basha përcolli këtë mesazh për mbështetësit e tij në orët e vona të mbrëmjes, pasi u nda nga kryeministri.

-Advertisement-

“Kam privilegjin e madh që më dhatë mundësinë të jem bashkë me ju në krye të kësaj beteje për zgjedhje të lira dhe të ndershme. Gjithçka ka ndryshuar, e pamendueshmja tre muaj më parë, sot është realitet, nesër nisim përgatitjet për tu dhënë shqiptarëve zgjedhjeve të lira dhe të ndershme dhe për të nisur së bashku rrugën drejt një Shqipërie ku gjithçka do të ndryshojë, asgjë nuk do të jetë si më parë bazuar vetëm në qëndresën dhe bashkimin tuaj. Tempulli i lirisë me ratifikimin e marrëveshjes do të jetë plot me ju qëndrestarë të bashkuar, do të jetë plot me qytetarët shqiptarë të djathtë e të majtë, që nuk ju ndanë asnjë ditë kësaj lëvizje, pra jo, nuk mbyllet sonte çadra. Nesër me zbardhjen e marrëveshjes dhe detajimin e saj do të jemi të gjithë këtu së bashku për të shpallur lajmin e mirë për çdo shqiptare dhe çdo shqiptar”.

Sot do të jetë dita e fundit e çadrës së opozitës në bulevardin ‘Dëshmorët e Kombit’ në qendër të kryeqytetit.

Politikol.al mëson se demokratët janë duke u përgaitur për të zhvendosur çadrën, por jo përpara se kryeopozitari, Lulzim Basha, të mbajë fjalimin përmbyllës të protestës gati 90 ditore.

Burime nga PD bëjnë të ditur për Politiko se do të pritet zbardhja e marrëveshjes me mazhorancën dhe më pas Basha do u drejtohet simpatinzantëve me një fjalim ku do i falenderojë për qëndresën dhe do i ftojë në nisjen e fushatës për zgjedhjet parlamentare.

Ndonëse nuk ka një afat zyrtar, palët po përpiqen të zbardhin marrëveshjen përpara orës 18:00 të ditës së sotme, në mënyrë që të zhvendoset çadra për të shmangur çdo provokim për shkak se në të njëjtën orë, pak metra më larg, Edi Rama do të hapë nga Piramida fushatën e PS për Tiranën.