Lajme

Sot hapet Panairi i Librit në Prishtinë

Autori: Gazeta inFokus 08:13 | 06 June 2023

Sot hapet Edicioni i 23-të i Panairit të Librit në Prishtinë. Organizatorët e këtij panairi kanë bërë të ditur së në këtë edicion pritet të marrin pjesë mbi njëqind (100) shtëpi botuese nga Kosova, Shqipëria, Maqedonia e Veriut e më gjerë. Në panair do të prezantohen mbi dymijë botime të reja me mbi 2 mijë tituj.

Me moton “Libri triumfon”, sot do të hapet edicioni i 23-të i Panairit të Librit i cili mbahet në ambientet e Pallatit të Rinisë i organizuar nga Shoqata e Botuesve të Kosovës. Organizatori i këtij panairi, Edon Zeneli, i tha Radio Kosovës se në këtë panair do të prezantohen botimet e mbi 100 shtëpive botuese me mbi dymijë tituj të rinj.

“Janë mbi 80 ekspozues që prezantojnë botimet e mbi njëqind (100) shtëpive botuese, duke e bërë kështu panairin më të madh në termat e botuesve pjesëmarrës. Kemi mbi dymijë tituj të rinj nga panairi i vitit të kaluar të cilët do të jenë të gatshëm për lexuesit”, tha ai.

-Advertisement-

Po ashtu, Zeneli tha se shkrimtari shqiptar me renome botërore, Ismail Kadare, do të jetë prezent në këtë edicion të Panarit dhe vepra e tij do të jetë kryefjala e Panairit të 23-të të Librit në Prishtinë “Prishtina 2023” , ku do të botohet kompleti i veprës së Kadaresë në 7 vëllime .

“Ismail Kadare do të jetë prezent që nga dita e parë që në hapje të Panarit të 23-të. Por pashmangshëm krye-ngjarja e këtij Panairi është botimi i kompletit të veprës së tij dhe prania e tij. Ismail Kadare ka vendosur që veprën e vet letrare në 7 vëllime ta kurorëzojë pikërisht në Prishtinë në Panairin e 23-të të Librit”, tha ai.

Sipas Zenelit në këtë edicion do të jenë dhjetëra promovime librash në Sallën e Promovimeve, dhjetëra autorë në stenda që bashkëbisedojnë dhe nënshkruajnë librat e tyre për lexuesit; takime ndërmjet përkthyesve, redaktorëve, botuesve e të gjithë profesionistëve të librit.

Edicioni i 23-të i këtij panairi do të mbahet nga data 6 deri më 11 qershor në Pallatin e Rinisë në Prishtinë.

Subscribe në YouTube: GAZETA INFOKUSI
Etiketa:
Fito 50 € për dyshekun e vjetër dhe merr dyshkeun e ri Cloud për vetëm 549 €
-Advertisement-

Të tjera

Fokusi

lajme