Sport

Sot fillon Kupa e Kosovës në basketboll

Autori: Gazeta inFokus 15:07 | 28 Shkurt 2018

Sot me ndeshjen Rahoveci – Kerasan Prishtina që do të luhet me fillim nga ora 17:15 do të startoj Final 8 i Kupës së Kosovës në basketboll që do të zhvillohet prej të mërkurës deri të dielën në palestrën “13 Qershori” në Suharekë, shkruan infokusi.

Ndërkaq ndeshja e dytë çerekfinale do të luhet duke filluar nga ora 20:00, ajo ndërmjet Golden Eagle Yllit dhe Boreas, derisa ceremonia e hapjes solemne e kësaj ngjarje madhështore për basketbollin kosovar do të bëhet në mes të dy ndeshjeve të para çerekfinale, pra në orën 19:15.

Të enjten në program janë dy ndeshje të tjera çerekfinale, Sigal Prishtina – Kalaja (17:30) dhe Bashkimi – Trepça (19:45).

-Advertisement-

Ndërkohë gjysmëfinalet do të luhen të premten, e para prej orës 17:30 dhe e dyta prej orës 19:00, si dhe finalet në të dyja konkurrencat të dielën prej orës 16:00 (femrat) dhe 19:00 (meshkujt).

Fituese të Kupës së Kosovës për edicionin e kaluar janë Sigal Prishtina te meshkujt dhe Pro Bet Prishtina te femrat.

Duhet theksuar se Kupa e Kosovës për herë të parë do të organizohet me këtë format, pra FINAL 8, duke filluar nga dita e mërkurë 28 shkurt e deri të dielën 4 mars në palestrën “13 Qershori” në Suharekë.

Final 8 më parë është organizuar në Gjakovë më 2014, por jo në këtë format. KB Golden Eagle Ylli në vitin 2015 ka qenë organizator i Final Four të Kupës së Kosovës. /INFOKUSI.COM