Lajme

Shukri Buja edhe sot në gjyq për shpërdorim detyre

Autori: Gazeta inFokus 10:09 | 31 May 2017

Po vazhdon edhe sot gjykimi i Shukri Bujës, ish- deputetit të PDK-së për shpërdorim detyre.

Sot mbrojtja e të akuzuarit dhe vetë i akuzuari kanë mundësi të kundërshtojnë provat dhe aktakuzën.

Në seancën e kaluar më 28 prill Buja u deklarua i pafajshëm.

-Advertisement-

Ai po gjykohet nga prokuroria për keqpërdorim të pozitës zyrtare në lidhje me një memorandum mirëkuptimi të nënshkruar nga Komuna e Lipjanit me kompaninë “NEË Co Feronikel Complex LL. C.”.

Komuna e Lipjanit në kohën kur drejtohej nga Shukri Buja më 21 mars 2008 kishte nënshkruar memorandum me “NEË Co Feronikel Complex LL. C.” për dhënien me qira kësaj kompanie një ndërtesë të laboratorit në Lipjan.

Sipas aktakuzës, në memorandum ishte përcaktuar që “NEË Co Feronikel Complex LL. C.” të paguajë nga një euro në muaj qira për objektin e laboratorit, ndërsa kompanisë ky laborator i ishte dhënë për 10 vjet.

Me këtë prokuroria pretendon se i është shkaktuar dëm Komunës së Lipjanit.

Bashkë me Bujën të akuzuar të këtij procesi janë edhe Nebih Zeqiri, Halit Gashi, Fahri Retkoceri, Hasim Vishesella, Edmond Rexhepi, Driton Avdiu, Burim Kodra, Bajram Rizani dhe Magbule Sadiku.

Përveç Bujës, tre nga të akuzuarit në kohën për të cilën ngarkohen ishin zyrtarë komunalë në Lipjan. /Kallxo.com/

Subscribe në YouTube: GAZETA INFOKUSI