Kryeministri, Albin Kurti, gjatë ditës së djeshme ka mbajtur një konferencë për media rreth punimeve në magjistralen Podujevë-Prishtinë, ku është zotuar se punimet në këtë rrugë do të përfundojnë në vitin 2022, shkruan Gazeta Infokus.

Ky zotim i Kurtit po kritikohet nga deputeti nga radhët e Partisë Demokratike të Kosovës, njëherësh kryetari i Komisionit për Ekonomi, Industri, Ndërmarrësi dhe Tregti, Ferat Shala.

Ai thotë se Kurti është duke përdorur çdo mekanizëm për të materializuar pjesën e fushatës së mbetur elektorale.

Sipas tij, zotimet që po e jep Kurti janë thjeshtë premtime elektorale dhe se nuk ka asgjë konkrete nga to.

“Nuk ka asnjë lloj parimi zhvillimor-ekonomik në këtë zotim. Të gjitha këto Kurti i bën për të mbrojtur edhe ato pak bastione qe i kanë mbetur, të cilat po pësojnë rënie drastike. Kurti, aktualisht po përdor çdo mekanizëm për të materializuar pjesën e mbetur të fushatës elektorale”, deklaron Shala për Gazetën Infokus.

Shala thotë se Kurti do të duhej që të njëjtin zotim ta bëjë edhe për rrugët tjera që kanë mbetur në gjysmë, por ai është fokusuar vetëm te rruga e Llapit, sepse atje i është rrezikuar partia.

“Të gjitha rrugën regjionale kanë mbetur në gjysmë pasi Kurti nuk i ka vazhduar asnjërën prej tyre. E kemi rrugën nga fshati Kijevë deri në Pejë ku nuk është bërë asnjë veprim konkret për të. Pastaj kemi rrugën tjetër nga Vushtrria deri në Mitrovicë e cila do të duhej të ishte prioritet, por nuk është punuar asgjë. Kemi edhe disa rrugë të tjera, por Kurti është fokusuar vetëm te rruga e Llapit, Prishtinë- Podujevë, sepse i është rrezikuar bastioni ose partia e tij të cilën edhe ashtu konsideroj që është në rënie”, ka shtuar Shala për Infokus.

Shala përkujton se për 20 vjet rresht Kurti ka qenë kritikues ndaj qeverive tjera, se janë vetëm qeveri të rrugëve e të asfalteve, ndërsa sot është kthyer saktësisht në të njëjtin sistem.

“Kurti për 20 vjet radhazi ka qenë kritikues se qeveritë janë vetëm qeveri të rrugëve e të asfalteve  ndërsa sot është kthyer saktësisht në të njëjtën retorik dhe po premton ndërtim të rrugëve të cilat as nuk kanë qenë në planet afatmesme e as afatgjate. Idetë për infrastrukturë, idetë për të shtruar rrugë janë kopje e zbehtë e qeverive të kaluara të Kurtit dhe praktikisht është kthyer prapë në një qeveri të asfaltit dhe të betonit” u shpreh Shala./Gazeta Infokus/

Black Friday ne Artmotion

Sponsoruar