Lajme

Shahin Dervishaj reagon pas arrestimeve të Speciales:Veprimet e Gjykatës janë një goditje edhe ndaj vlerave më të shenjta të luftës sonë çlirimtare

Autori: Gazeta inFokus 16:11 | 05 December 2024

Kandidati për deputet nga Partia Demokratike e Kosovës, Shahin Dervishaj, ka reaguar në rrjetin social Facebook, për veprimet e Gjykatës Speciale ndaj figurave që kanë kontribuar për lirinë e Kosovës.

Ai ka shkruar se veprimet e Gjykatës Speciale janë një goditje, jo vetëm ndaj tyre personalisht por edhe ndaj vlerave të shenjta të luftës sonë çlirimtare.

“Veprimet e përsëritura të Gjykatës Speciale, ndaj figurave që kanë kontribuar me sakrificë dhe përkushtim për lirinë e Kosovës, janë një goditje, jo vetëm ndaj tyre personalisht, por edhe ndaj vlerave më të shenjta të luftës sonë çlirimtare. Gjykata Speciale, që nga themelimi, ka shërbyer si një mjet i padrejtë, që ka në shënjestër vetëm individët më të devotshëm të popullit tonë, ndërsa masakrat dhe krimet e kryera nga Serbia mbesin pa përgjigje.”, ka shkruar Dervishaj

-Advertisement-

Ai tutje thotë se ne duhet të qëndrojmë të bashkuar në mbrojtje të dinjitetit të UÇK-së dhe të mos lejojmë që historia jonë të përmbyset me narrativa të padrejta.

“Arrestimet e Gjykatës Speciale të ish-kryetarit të komunës së Malishevës, z. Isni Kilajn, ish-drejtorit të AKI-së, z. Bashkim Smakaj, dhe ish-luftëtarit të UÇK-së, z. Fadil Fazliu janë përpjekje për të justifikuar padrejtësitë e kësaj gjykatë. Sikurse edhe bastisja e shtëpisë së ish-ministrit të Drejtësisë, z. Hajredin Kuqi. Drejtesia për çlirimtarët do të jetë triumfi i luftës së pastër të UÇK-së dhe përgjigja e gjithë padrejtësive të kësaj gjykate politike.”, ka shkruar tutje Dervishaj.

Ndërkaq sot Gjykata Speciale ka arrestuar ish-kryetarin e komunës së Malishevës. Isni Kilajn, ish-drejtorit të AKI-së, Bashkim Smakaj, dhe ish-luftëtarit të UÇK-së, Fadil Fazliu.

Gjithashtu Specialja ka kryer bastisje edhe në shtëpinë e ish ministrit të Drejtësis Hajredin Kuqi.

Këtu mund të ndiqni postimin:

Subscribe në YouTube: GAZETA INFOKUSI