Sport

Sevilla “bën planin” si të ndalë Sanchezin

Autori: Gazeta inFokus 08:44 | 21 February 2018

Trajneri i Sevillas, Vincenzo Montella, ka thënë se mënyra e vetme që skuadra e tij të ndalë sulmuesin e Manchester Unitedit, Alexis Sanchez në ndeshjen e parë të 1/8 së finales të Ligës së Kampionëve të mërkurën mbrëma, është “ta lidhë atë me litar”.

Sanchez ka shënuar vetëm një gol në pesë ndeshje që kur kaloi te Unitedi nga Arsenali muajin e kaluar. Mirëpo, ai ka ngjallur ofensivën e skuadrës së Jose Mourinhos dhe e demonstroi këtë me pasimin e saktë të Romelu Lukaku në fitoren 2:0 të shtunën në FA Cup ndaj Huddersfield Townit, transmeton Koha Ditore.

“Si të ndalim Sanchezhin? Nuk e di, duhet të bllokojmë atë në ndonjë mënyrë, ndoshta ta lidhim me litar”, ka deklaruar Montella në konferencë për media të martën. “Ai është lojtar fantastik, e kam parë duke luajtur në Itali. Ai është përmirësuar aq shumë, ndërsa karriera e tij ka përparuar, është shumë i shpejtë, udhëheq kundërsulmet dhe është shumë i fuqishëm”.

-Advertisement-

Montella ka qenë një zgjedhje befasuese te Sevilla, pasi Eduardo Berizzo u shkarkua në dhjetor. Mirëpo, nëse ai arrin të mposhtë Manchester Unitedin e Jose Mourinhos, do të jetë trajneri i parë që ka udhëhequr skuadrën e La Ligas në çerekfinale të Ligës së Kampionëve.