Lajme

Sa shpenzoi reformatori i Qeverisë Haradinaj për dreka mëditje e akomodime! (DOKUMENT)

Autori: Doresa Geci 14:30 | 15 November 2019

Mbi 1 mijë e 600 euro i ka shpenzuar, Besnik Tahiri, vetëm për mëditje, nga momenti i marrjes se pozitës si Koordinator Nacional për Reforma Shtetërore.

Që nga emërimi në këtë pozitë që 19 muaj, Tahiri ka shpenzuar afro 9 mijë euro, për akomodim, dreka, mëditje e shpenzime të tjera, shkruan Gazeta inFokus.

Në bazë të dhënave që Gazeta inFokus ka siguruar nga Zyra e Kryeministrit, përmes kërkesës në qasjen në dokumente publike, Tahiri ka shpenzuar për mëditje, 1 mijë e 616 euro, për akomodim 1 mijë 900 euro, për dreka, 840 euro, për shpenzime tjera të pa specifikuara rreth 3 mijë e 750 euro.

-Advertisement-

Nënkryetari i AAK-së, Besnik Tahiri u emërua në këtë pozitë me 16 mars të vitit 2018, pozitë kjo e shpikur në Qeverinë Haradinaj, shkruan Gazeta inFokus.

Funksioni i tij sipas vendimit të Qeverisë, ishte të koordinojë, mbështes, analizojë dhe lehtësojë procesin e reformave në bashkëpunim të plotë me institucionet kompetente, vendore dhe ndërkombëtare.

Por përveç këtij, Haradinaj gjatë mandati të tij kishte emëruar edhe tre koordinator të tjerë.

Në “armatën” e tij Haradinaj kishte edhe koordinatorin për Ndryshime Klimatike dhe Çështje të Ambientit, Mendim Rugovën, koordinatorin nacional për Kulturë, Rini dhe Sport, Rexhep Hotin dhe Avdullah Hasanin – koordinator Nacional për Gjeneratën e Re.

Qeveria Haradinaj do të kujtohet si një ndër qeveritë më të mëdha ndonjëherë .

Kjo qeveri kishte 21 ministra me afro 80 zëvendësministra dhe me katër koordinator.

Paga mujore e një koordinatori është 1270 euro, duke bërë kështu që Kosova ta ketë qeverinë me numrin më të madh të anëtarëve të saj në rajon.

Gazeta inFokus ditë me parë ka raportuar për shpenzimet e Koordinatorit Nacional për Kulturë, Rini dhe Sport, Rexhep Hotit .

Në ditët në vijim do të sjellim edhe shpenzimet e Koordinatorit për Ndryshime Klimatike dhe Çështje të Ambientit, Mendim Rugovës, dhe Koordinatorit Nacional për Gjeneratën e Re, Avdullah Hasanit./Gazeta inFokus/