Lajme

“Rusia përdor Këshillin e Sigurimit për të dezinformuar dhe abuzuar me privilegjet e saj”

Autori: Gazeta inFokus 20:02 | 18 March 2022

Misioni i Shqipërisë në Organizatën e Kombeve të Bashkuara (OKB), ka shpërndarë në median sociale, Twitter, një deklaratë të përbashkët për dezinformatat ruse dhe detyrën që ka për t’i paraqitur ato me fakte.

Gjithashtu, Rusia u akuzua se abuzon me privilegjet, si anëtare e përhershme e Këshillit të Sigurimit, i cili supozohet të jetë “një vend për arritjen e paqes përmes diplomacisë”.

“Pra, ne jemi këtu sot për t’i kërkuar llogari Rusisë. Për të thënë të vërtetën. Dhe për të siguruar që gënjeshtrat dhe dezinformatat e tyre të përballen me fakte”, thuhet në deklaratë.

-Advertisement-

Deklarata, e lexuar nga Ambasadorja Linda Thomas-Greenfield, Përfaqësuese e SHBA-së në Kombet e Bashkuara, ka ardhur para mbledhjes së Këshillit të Sigurimit të OKB-së dhe është në emër të Shqipërisë, Francës, Irlandës, Norvegjisë, Mbretërisë së Bashkuar dhe Shteteve të Bashkuara.

“Rusia po përpiqet edhe një herë ta përdorë këtë Këshill për të pastruar dezinformatat e saj, për të përhapur propagandën e saj dhe për të justifikuar sulmin e saj të paprovokuar dhe brutal ndaj Ukrainës”, thuhet në deklaratë.

Gënjeshtrat dhe dezinformacionet nga pala ruse, ths Thomas-Greenfield, janë krijuar për një qëllim, “për të shmangur përgjegjësinë për luftën e zgjedhur të Rusisë dhe katastrofën humanitare që ajo ka shkaktuar”.

Në deklaratë është përmendur se Rusia është ajo që posedon armë biologjike, dhe jo Ukraina siç është akuzuar nga Kremlini.

“Siç e dini të gjithë – dhe siç duhet t’ia kujtojmë publikut – është Rusia ajo që ka mbajtur prej kohësh një program armësh biologjike në kundërshtim me ligjin ndërkombëtar – jo Ukraina. Është Rusia ajo që ka një histori të mirë-dokumentuar të përdorimit të armëve kimike – jo Ukraina. Dhe është Rusia, ajo që filloi këtë luftë të pakuptimtë”.

Nuk u la pa përmendur edhe roli i Rusisë si anëtare e përhershme e Këshillit të Sigurimit të OKB-së, duke e akuzuar se ka “abuzuar me përgjegjësitë dhe privilegjet e saj”.

“Ne do vazhdojmë të sigurojmë që taktikat e tyre të përballen me një kor të fuqishëm zërash nga e gjithë komuniteti ndërkombëtar të përgatitur për të qëndruar me Ukrainën dhe për të dalë në mbrojtje të Kartës së OKB-së”, përfundon deklarata.

Subscribe në YouTube: GAZETA INFOKUSI
Hapet shkolla e mesme profesionale në Qytetin e Ferizajit
-Advertisement-

Të tjera

Fokusi

lajme