Sport

Ronaldo-Messit: Urime, e merituat fitoren

Autori: Gazeta inFokus 16:37 | 26 December 2017

“Futbollisti më i mirë në botë është Ronaldo! Kurrsesi, është Messi! Jo, është Ronaldo, jo është Messi…”! Debatet, shpesh edhe të ashpra, deri në hidhërime serioze mes miqve, me siguri do të zgjasin edhe shumë kohë në tërë planetin, duke bërë prej tyre “të mirin dhe të keqin”, “të ndritshmin dhe të errëtin”…

Por, ajo që ndodhi në El Clasicon e 175-të kampionale të shtunën që shkoi, tregon se mes këtyre dy viganëve të futbollit ekziston një respekt i madh i ndërsjellë.

Ishin disa momente gjatë ndeshjes dhe pas përfundimit të saj që treguan shumë qartë se Leo dhe Christiano nuk janë armiq. Këtë e kanë dëshmuar fjalët e Ronaldos menjëherë pas përfundimit të ndeshjes, në të cilën Barcelona në mes të Madridit triumfoi me 0:3 duke e lënë Realin madje 14 pikë prapa në tabelën e klasifikimit.

-Advertisement-

Siç zbuluan mediat lokale nga Barcelona, edhe atë duke iu referuar vetë Messit, pas përfundimit të El Klasikos Ronaldo i është afruar asit argjentinas dhe së pari i ka thënë: “Urime! E merituat fitoren”.

Por, Ronaldo s’do të ishte ai që është, një nga sportistët më të etshëm për triumfe, po të mos i kishte shtuar këtij urimi edhe diçka:

“Por…, mos mendo se do të heqim dorë nga lufta për titullin, se një gjë e tillë as që na bie ndër mend”, ka porositur portugezi.

Messi pas kësaj vetëm ka buzëqeshur, duke mos pasur asgjë kundër asaj që duelet e tyre të vazhdojnë përderisa dallimi në pikë në tabelë është i tillë çfarë është tani.

Në fakt, siç shkruan Expressi, kur të shikohen statistikat e ndeshjeve mes Realit dhe Barçës në të cilat kanë luajtur këta dy, argjentinasi qëndron më mirë: Ronaldo ka shënuar 17 gola dhe ka fituar dhjetë herë, ndërsa Messi ka shënuar 21 herë, duke realizuar 16 fitore.

Subscribe në YouTube: GAZETA INFOKUSI