Pas reagimeve të shumta ndaj urdhrit të Gjykatës Speciale për të marr si dëshmitar të Dhomave të Specializuara pa vullnetin e tij, gazetarin Halil Berisha, ka reaguar edhe Daut Haradinaj.

Ai ka thënë se dëshmia është urdhër nga gjykata dhe si e tillë është obligative.

“Dëshmia është urdhër i gjykatës dhe është obligative, prandaj nuk duhet paragjykuar ashtu”, ka thënë ai për Infokus.

Analisti Imer Mushkolaj ka deklaruar se opinioni duhet ta kuptoj që gazetari Halil Berisha nuk është në Hagë në cilësinë e dëshmitarit por se ai ka qenë i obliguar.

Lexo edhe: SQARIM: Halil Berisha nuk është dëshmitar kundër krerëve të OVL -UÇK, ai është atje nën detyrim

“Është e rëndësishme që opinioni me e kuptu që ish-gazetari i Infokus-it, Halili nuk është në Hagë në cilësinë e dëshmitarit kundër të krerëve të organizatës së OVL-UÇK, por është shumë e rëndësishme me e qartësu, ai nuk po dëshmon kundër tyre, ai nuk po dëshmon kundër kërkujt, por ai është i obliguar, ka qenë i obliguar duke u bazuar në procedurat përkatëse të gjykatës të dëshmojë atje për punën e tij si gazetar në raport me dokumentet që OVL-UÇK i ka bërë publik”, ka thënë Mushkolaj për Infokus.

Edhe gazetari Milaim Zeka, ka thënë se dëshmia e ish gazetarit të Infokus-it, nuk është në asnjë mënyrë kundër krerëve të OVL e UCK-së, Hysni Gucatit e Nasim Haradinajt.

“Unë e përcolla dëshminë e gazetarit Halil Berishës dhe nuk ka këtu asgjë në mënyrë absolute që zotëri Berisha ka dëshmuar kundër dikujt. Asnjë dëshmi nuk ke as kundër Hysni Gucatit dhe Nasim Haradinajt. Çdo gjë është filmuar, e shkruar. Gazetarët e Kosovës janë sjellë më përgjegjshmëri duke përfshirë këtu edhe zotëri Berishën të cilët për shkak të ndjeshmërisë nuk kanë publikuar ato dosjet. Dosja e zotëri Berisha nuk ka të bëjë asgjë më zotëri Haradinajn e Gucatin”, ka thënë Zeka.

Ndërsa analisti Valon Syla ka thënë se nëse do të ishte ndonjë gazetar i ndonjë vendi tjetër nuk do të ishte në Hagë.

“Gazetari Halil Berisha po të ishte gazetar dhe shtetas i ndonjë vendi tjetër, që nuk është i ish Jugosllavisë, sot nuk do të ishte në Hagë. Por është i Kosovës, ku Gjykata Speciale ka rregulla speciale edhe për lirinë e shprehjes për gazetarët. Fatkeqësia është që institucionet tona heshtin para arrestimit të një gazetari, ashtu siç heshtin kur Gjykata Speciale ju kërkon garancione për mbrojtje në liri për çlirimtarët që akuzohen atje në Hagë. Ai nuk është dëshmitar, por është i detyruar të jep përgjigje… për një punë që një gazetar nga Brukseli ose nga Haga nuk do të guxohej të merrej në pytje.”, ka thënë Syla.

E reagime ka pasur edhe nga gazetarët e Shqipërisë. Isa Myzyraj nga Ora News ka thënë se është për tu vlerësuar profesionalizimi i gazetarit, Halil Berishës.

“Miku im Halil F. Berisha ka dëshmuar në Dhomat e Specializuara të Gjykatës Speciale. Profesionalizmi i tij është për t’u vlerësuar si edhe i tërë ekipit të Gazeta Infokus dhe drejtuesit të saj Zekirja Shabani Liria e medias, është thelbësore në demokraci, ndaj Halili si edhe tërë ekipet e gazetarëve kanë bërë punë me profesionalizëm dhe dashuri të për të vërtetën”, ka thënë ai.

Halil Berisha është duke dëshmuar në Gjykatën Speciale për dy ditë me radhë.

Gazetari Halil Berisha, nuk është duke dëshmuar për luftën, UÇK-në, apo kundër krerëve të OVL-UÇK-së, por thjeshtë si gazetar që mori pjesë në konferencën për media të organizuar nga OVL-UÇK-ja, ku u bënë publike dosjet e Gjykatës Speciale. /Gazeta Infokus/

BKT Kosova vlerësohet për herë të tretë "Banka e Vitit 2023 në Kosovë" nga The Banker

Sponsoruar