Lajme

Reagon ashpër Hoti pas deklaratave të zyrtarëve serb për viktimat e luftës në Kosovë

Autori: Gazeta inFokus 12:24 | 05 October 2020

Kryeministri i Kosovës, Avdullah Hoti ka reaguar pas deklaratave të disa zyrtarëve serbë të cilët fyen rëndë viktimat e luftës së fundit në Kosovë.

Hoti ka thënë se shpreh zhgënjim të thellë ndaj këtyre deklaratave të zyrtareve serbë të cilët sipas tij po vazhdojnë ta shfaqin mungesë respekti për viktimat.

Hoti po ashtu ka thënë se këto deklarata dëshmojnë se Beogradi zyrtar gjatë gjithë këtyre viteve ka mbuluar gjurmët e krimit, shkruan Gazeta inFokus .

-Advertisement-

“Qeveria e Republikës së Kosovës shpreh zhgënjimin e thellë ndaj disa deklaratave publike të zyrtarëve të lartë të Serbisë, të cilët hapur vazhdojnë të shfaqin mungesë të thellë respekti për viktimat e luftës së fundit në Kosovë, si dhe familjet e tyre, të cilat, qe dy e më shumë dekada, vazhdojnë t’i kërkojnë me dëshpërim të afërmit e tyre të rrëmbyer nga forcat serbe. Këto deklarata skandaloze, përveçqë fyejnë rëndë të gjitha viktimat e krimeve serbe, dëshmojnë para botës se Beogradi zyrtar, gjatë gjithë këtyre viteve, qëllimisht dhe vetëdijshëm i ka mbuluar gjurmët e krimit, duke e mbajtur fshehur vendndodhjen e varrezave masive, në të cilat kanë përfunduar mijëra civilë të pafajshëm”, ka thënë Hoti.

Ai po ashtu ka thënë se qenëria e Kosovës e kundërshton fuqishëm këtë mendësi politike të zyrtarëve serbë.

“Qeveria e Republikës së Kosovës e kundërshton këtë mendësi politike dhe presim që këtë ta bëjë edhe bashkësia ndërkombëtare, veçmas Bashkimi Evropian dhe Shtetet e Bashkuara të Amerikës, si faktorë të pazëvendësueshëm të ndërtimit të paqes dhe të perspektivës euroatlantike të Ballkanit Perëndimor. Qeveria e Republikës së Kosovës është e vendosur të punojë me përkushtim për një të ardhme paqësore të rajonit dhe do të vazhdojë të bashkëpunojë fuqishëm me aleatët perëndimorë për integrimin sa më të shpejtë në familjen e madhe të vendeve të qytetëruara e demokratike euroatlantike, në të cilën nuk ka vend për urrejtje ndaj etnive të tjera”, ka thënë Hoti në reagimin e tij./Gazeta inFokus/

Subscribe në YouTube: GAZETA INFOKUSI