Lajme

Rama paralajmëron bizneset për vitin tjetër: S’ka plazhe për restorantet, shezllone për hotelet vetëm për aq sa kanë dhoma

Autori: Gazeta inFokus 16:17 | 15 September 2024

Nga viti tjetër turizmi shqiptar do jetë përballë ndryshimeve thelbësore. Kryeministri Edi Rama paralajmëroi bizneset private, restorantet dhe beach baret se nuk do të kenë më leje për të vendosur çadra në hapësirat e plazheve.

“Përveçse se ata kanë hotele nuk mund të jepen më leje plazhesh për të ardh një individ, një person juridik apo fizik, për të thënë dua këtë plazhin këtu do të vë beach bar e do të vë shezllone. Mund të vësh beach bar por nuk ke shezllone. Mund të kesh restorant por nuk ke shezllone. Plazhi duhet shijuar në mënyrën më të mirë të mundshme. Dhe shijimi i plazhit mes atyre krevateve të ngjitur me njëri tjetrin është e pamundur”.

Hotelet që do të vendosin shezllone, do të duhet të respektojnë disa rregulla.

-Advertisement-

“Nuk mund të kesh një hotel me 40 dhoma dhe të vësh 200 shezllone e të marrësh popull aty e ti detyrosh të paguajnë. Do të vësh shezllone për aq sa ke kapacitet! Natyrisht jo një për dhomë, dhe do të lësh distancë nga shezlloni në shezllon”.

Njësitë e pushtetit vendor do të kenë rol kryesor në menaxhimin e sektorit turistik, me caktimin e hapësirave publike për qytetarët.

“Do ta fillojmë me bashkitë, që bashkitë të marrin hapësira e të vendosin bashkitë çadra. Aty ku është e arsyeshme e shezlloneve, por me çmim tavan të detyruar. E kemi filluar prej disa vitesh, këtë vit e shtymë më përpara që bashkitë ta administrojnë”.

Duke u kthyer në një nga sektorët më potencialë për ekonominë e vendit, kryeministri ju bën thirrje bizneseve për të vlerësuar punonjësit dhe për të rritur pagat e tyre.

“Tani kam kuptuar që kur nuk ka njerëz, ti duhet të ngresh rrogën se nuk ke ku shkon. Do t’i konsiderosh ata njerëz që punojnë për ty, gjënë më të çmuar që ke.

Këtë vit Shqipëria u vizitua nga 7.2 milionë turistë vetëm në tetë muaj, duke pësuar rritje me 60 përqind krahasuar me vitin e kaluar.

Këtë vit kam dëgjuar nga disa që kanë marrë njerëz që janë kthyer nga Greqia dhe më thonë që kemi interesim nga ata që janë në Greqi. Nuk ka më asnjë krahasim, të punosh kamerier në Greqi dhe Shqipëri, ke më shumë përfitime në Shqipëri”.

Subscribe në YouTube: GAZETA INFOKUSI
Black Friday ne Artmotion
-Advertisement-

Të tjera

Fokusi

lajme