Lajme

Radoiçiq, Lista Serbe e Dodik, Peci: Maskaradë e dështuar e idesë “Serbi e madhe”

Autori: Gazeta inFokus 16:25 | 22 April 2023

Drejtori i KIPRED-it, Lulzim Peci ka komentuar prezencën e përfaqësuesve të Listës Serbe, Milan Radoiçiqit dhe Millorad Dodikut me rastin e prezantimit të kapaciteteve të ushtrisë serbe në Aeroportin e Batajnicës.

Peci, përmes një statusi në Facebook, ka thënë se krejt kjo është një maskaradë e idesë së “Serbisë së madhe”.

Sipas tij, këto ide të tilla kanë dështuar kaherë, edhe kur Serbia ishte ushtarakisht më e fortë se që është tani.

-Advertisement-

“Beogradi paska zgjedhur sot që në prezantimin e kapaciteteve të ushtrisë së Serbisë të ftoj Dodikun e Republikës Serbe dhe Listën Serbe. Mirëpo, krejt kjo në fund të fundit është një maskaradë e idesë së ‘botës serbe’ apo Serbisë së madhe, e cila në kohen e Millosheviqit dështoi edhe pse ishte shumë herë më e fuqishme ushtarakisht se sa tani në raport më fqinjët e saj.

Këtë besoj se e ka kuptuar edhe populli serb, i cili e di fort mirë se ushtria serbe nuk mund ta kalojë asnjë metër përtej kufijve të Serbisë”, ka shkruar ai.

Në Serbi sot u mbajtën stërvitjet ushtarake, në kohën kur lufta në Ukrainë po vazhdon dhe rajoni i Ballkanit Perëndimor po përballet me tensione.

Rritja e arsenalit ushtarak të Serbisë ka rritur shqetësimet në mesin e disa shteteve fqinje, që kanë shprehur frikën se mund të kërcënohet paqja e brishtë në rajonin që ishte mbërthyer nga luftëra të përgjakshme në vitet ’90.

Stërvitjet ushtarake u mbajtën një ditë para mbajtjes së zgjedhjeve të jashtëzakonshme lokale në veri të Kosovës, shtet që ka shpallur pavarësinë më 2008. Serbia nuk e njeh Kosovën si shtet të pavarur.

Subscribe në YouTube: GAZETA INFOKUSI