Lajme

Pushteti rrëzoi rezolutën kundër Mimoza Kusari-Lilës

Autori: Gazeta inFokus 14:48 | 30 October 2024

Me humor të mirë, duke u shkrirë së qeshuri, deputetët e mazhorancës e rrëzuan sot projekt-rezolutën nga debati parlamentar për komunikimet e Mimoza Kusari-Lilës me Millan Radoiçiqin.

Projekt-rezoluta, e propozuar nga opozita, kërkonte hetimin dhe shkarkimin e shefes së Grupit Parlamentar të Lëvizjes Vetëvendosje.

Në seancën e sotme të rregullt të Kuvendit të Kosovës, rezoluta kundër Kusari-Lilës u rrëzua me 60 vota kundër dhe një “pro” projekt-rezolutës.

-Advertisement-

Vota për, e qëllimshme apo e paqëllimshme nga një deputet i pushtetit, shkaktoi të qeshura në sallë. Kjo ndodhi bash në momentin kur u rrëzua projekt-rezoluta, e cila kishte në qendër të saj bisedën e Kusari-Lilës me kryeterroristin e Banjskës, Millan Radoiçiq.

Dikush nga grupi i deputetëve të mazhorancës sugjeroi se vota “për” u vendos gabimisht.

“Jo ka gabu, po për mësysh ma merr mendja..”, tha kryetari Glauk Konjufca. “kështu që rrëzohet kjo projekt-rezolutë”.

Projekt-rezoluta kërkonte hetimin e Kusari-Lilës dhe shkarkimin e saj nga funksioni i kryetares së grupit parlamentar.

Rreth dy javë më parë, u publikua një përgjim në të cilin u dëgjua zëri i Kusari-Lilës tek bisedon me terroristin Radoiçiq. Përgjimi i publikuar nga Paparaci, tregon Kusari-Lilën dhe Radoiçiqin teksa koordinohen për ligje të rëndësishme.

Publikimin, deputetja Kusari-Lila e ka quajtur të montuar.