Lajme

PSD për marrëveshjen me Serbinë: Kjo qeveri legalizoi dokumentet ilegale të Serbisë

Autori: Gazeta inFokus 18:38 | 30 August 2022

Partia Socialdemokrate (PSD) ka komentuar marrëveshjen e arritur nga Qeveria e Kosovës me Serbinë për çështjen e dokumenteve për hyrje/dalje.

Nëpërmjet një postimi në ‘Facebook’ në formë komunikate, ky subjekt politik thotë se nëpërmjet kësaj marrëveshje “legalizoi dokumentet ilegale të vulosura nga Serbia”.

“Iku pa u komentuar, pa u dalluar, pika që e bëri të pranueshme për Vuçiqin marrëveshjen për dokumentet e identifikimit (ID). Problemi fillon kur kjo pikë bëhet pozicion zyrtar edhe i shtetit tonë. Kjo qeveri legalizoi dokumentet ilegale, të vulosura nga Serbia. Letërnjoftimet në fjalë e trajtojnë Kosovën si pjesë të brendshme të Serbisë. A nuk është ky cenim dhe degradim?”, thuhet në reagim.

-Advertisement-

“Por në fund të ditës, këto marrëveshje të pjesshme nyjëzohen tek Asociacioni etnik. Prej deklaratave që nuk do të diskutohet për çështje të brendshme të Kosovës e deri te pozicioni që njeh dokumentet ilegale është kapërcim i madh. Zhvillim dramatik!

Deklarata publike nga Kurti, Bislimi dhe Konjufca se nuk bëhet fjalë për Asociacion, kur bisedohet me Serbinë, i mori uji. Pozicioni i Kosovës kundër Asociacionit po tretet. Mbase kurrë nuk paska qenë. Dhe krejt kjo në emër të normalizimit të marrëdhënieve.

Por çka po normalizohet? Ky term nuk është neutral. Në këtë situatën po normalizohet mosnjohja, po përjetësohet tensioni dhe po ruhet konflikti.

Zhurma e festës së propagandës nuk mund as t’i kompensojë, as fsheh humbjet”, përfundon postimi i PSD-së.

Subscribe në YouTube: GAZETA INFOKUSI