Lajme

Protesta para zyrës së PD-së, Rama: ‘Shfaqje mesjetare’ që mund të kishte degjeneruar në gjakderdhje

Autori: Gazeta inFokus 13:04 | 09 January 2022

Kryeministri i Shqipërisë, Edi Rama e quajti “shfaqje mesjetare” sulmin ndaj godinës së Partisë Demokratike.

Rama tha se ngjarja e djeshme mund të “kishte degjeneruar në gjakderdhje”.

“Mund të kishte degjeneruar në diçka të pangushëllueshme për PD-në, për demokratët, por edhe për të gjithë shoqërinë. Si njëri si tjetri [Lulzim Basha dhe Sali Berisha], të dyja kufomat politike kanë marrë peng atë parti në kacafytjen e tyre, për fat të keq ishin papërgjegjshmërish të gatshëm ta luanin deri në fund lojën e mbrojtjes apo marrjes së kështjellës më gjakun e demokratëve”, u shpreh Rama.

-Advertisement-

Ai këto komente i bëri në një bashkëbisedim të paralajmëruar, drejtuar demokratëve përmes rrjetin social Facebook. Rama i konsideroi ngjarjet e djeshme si ekstreme dhe se dëmtojnë institucionet demokratike të vendit.

“Një zhvillim i kësaj natyre që patjetër e dobëson kundërshtarin politik, në fakt godet vendin. Godet shoqërinë, godet të gjithë ngrehinën e kulturës politike e cila për të gjitha arsyet që dimë për shkak të historisë e traditës jo dhe aq bujare të shqiptarëve në raport me institucionet dhe shtet formimin përbën realisht problem. Kjo kulturë politike dje ka marrë një goditje të tmerrshme”, ka theksuar Rama.

Ai tha se zhvillimet e ditës së djeshme nuk dëmtojnë vetëm PD-në, por “dëmton ngrehinën institucionale të Shqipërisë”.

“Ky është shkatërrim që dëmton institucionin demokratik të opozitës, por edhe gjithë kornizën institucionale të vendit”, tha kryeministri.

Ditën e djeshme, mbështetës të ish-kryeministrit Sali Berisha me trapanë dhe çekiçë në duar tentuan të futeshin brenda ambienteve të selisë së PD-së. Ata shqyen dyert dhe thyen dritaret, ndërsa përdorën shkallët për t’u ngjitur me dhunë në katin e dytë të godinës.

Incidentet nuk kanë munguar as brenda ambienteve të PD-së, ku kanë plasur kapsolla dhe është përdorur gaz lotsjellës dhe fikës zjarri kundrejt protestuesve.

Pas përplasjeve fizike dhe incidenteve të ndodhura në selinë e PD ditën e shtunë, Policia ka shoqëruar së paku 59 persona, prej tyre 8 të mitur. /Euronews.al/

Subscribe në YouTube: GAZETA INFOKUSI
Etiketa:
BKT Kosova vlerësohet për herë të katërt "Banka e Vitit 2024 në Kosovë" nga The Banker
-Advertisement-

Të tjera

Fokusi

lajme