ProCredit Bank, si njëra ndër bankat më të mëdha në vend është denoncuar publikisht nga një klient i saj për shkelje të kontratës për mirëmbajtjen e llogarisë bankare.

Safet Fazliu, si njohës i ekonomisë dhe si drejtor i një organizate joqeveritare, ka treguar se kur e ka hapur llogarinë bankare, mes tij dhe bankës ishte nënshkruar një kontratë dypalëshe (klient-bankë) në të cilën ishte përfshirë edhe kostoja prej  1.00€/Muaj për “mirëmbajtje” të llogarisë së biznesit dhe  0.70€/Muaj kostoja për llogarinë private.

Mirëpo, tash ai ka mësuar se ajo kontratë është shkelur në mënyrë të njëanshme nga banka.

Për rrjedhoj çmimet e mirëmbajtjes së xhirollogarisë janë rritur.

“Për ‘mirëmbajtje’ të llogarisë së biznesit paska vendosë me na i marrë, jo më nga 1.00€ po nga 5.00€/Muaj (apo 400.00% më shumë), ndërsa për llogaritë private jo më nga 0,70€ por nga 2.00€/Muaj (185.71% ma shumë)”, ka shkruar Fazliu në llogarinë e tij në Facebook.

“Sipas kësaj ‘rregulle’, po i bije që banka, në mënyrë të njëanshme (arbitrare), kur të donë, sa herë të donë dhe sa të donë merr para nga llogarit tona?”, ka shtuar ai.

Se kjo që thotë ky klient është e vërtetë e ka konfirmuar për AktivPress edhe operatori i Qendrës së thirrjeve në ProCredit Bank, Gent Shllaku.

“Është e vërtetë se prej 1 qershorit 2017 e kemi marrë këtë vendim dhe së shpejti do ta bëjmë publike atë. Në bazë të kushteve të bankës e kemi ndryshuar koston”, ka thënë ai.

I pyetur nëse është e vërtetë që Banka nuk i ka njoftuar paraprakisht klientët e saj për këtë rritje të çmimeve të mirëmbajtjes, ai ka pohuar se është e vërtet.

“S’e kemi parë të nevojshme që të konsultohemi me klientët paraprakisht.  Thjesht nëse ata kanë ndonjë ankesë apo paqartësi mund të drejtohen në ProCredit, apo për ankesa edhe në Bankën Qendrore të Kosovë”, ka deklaruar Shllaku.

AktivPress ka pyetur edhe disa qytetarë nëse janë në dijeni për këtë vendim të ProCredit Bank, por asnjëri nuk ka pasur përgjigje pozitive.

Safet Fazliu, ai që e ka denoncuar në mënyrë publike këtë rast, ka thënë se ky fenomen duhet të jetë alarm për Bankën Qendrore të Kosovës (BQK), që në përgjegjësinë e saj, si rregullatorë dhe mbikëqyrës i tregut bankar, të merr masa urgjente për ndalimin dhe ndëshkimin e kësaj mënyre të dëmtimit të klientëve nga PCP (me bankat tjera nuk kam përvojë, s’di si veprojnë në këtë aspekt)./AktivPress

Comodita Home dhe Prince Caffe: Sponsor të përgjithshëm të Sunny Hill Festival

Sponsoruar