Lajme

Pritet të arrestohet, deputeti e dorëzon vetë mandatin në Kuvend

Autori: Gazeta inFokus 22:37 | 29 March 2022

Deputeti socialist Alqi Bllako ka reaguar pas urdhër-arrestit të lëshuar nga SPAK, pasi akuzohet për aferën e Inceneratorëve.

Në Facebook, Bllako shkruan se është i tronditur, dhe një proces i drejtë e i paparagjykuar, do të provojë pafajësinë e tij.

Më tej Bllako shkruan se ai do të përballet me drejtësinë si qytetar i lirë dhe nesër do të dorëzojë mandatin e deputetit.

-Advertisement-

Statusi i plotë:

Të nderuar miq! Natyrisht jam i tronditur nga kërkesa e SPAK-ut për ndalimin tim.

Kam bindjen e thellë që një proces i paparagjykuar dhe i drejtë do ta provonte lehtësisht pafajësinë time; me bindjen e palëkundur se as kam shkelur kurrë ligjet e vendit e madje as kam thyer kurrë etikën e detyrës që kam ushtruar!

Sidoqoftë, nuk ka arsye të angazhohet Kuvendi i Republikës së Shqipërisë për këtë çështje dhe as nuk dua të përfitoj apo të më ofrohet një trajtim ndryshe nga çdo qytetar tjetër i vendit tonë. Unë nuk kam mburojë mandatin e deputetit, por të vërtetën për pafajësinë time. Këtë do ta provoj në gjykatë dhe përpara opinionit publik.

Prandaj kam vendosur që ditën e nesërme t’i paraqes Kryetares së Kuvendit dorëzimin e mandatit tim si deputet i Republikës së Shqipërisë, dhe të përballem me akuzën pa asnjë privilegj.

Si një qytetar i zakonshëm, si prind dhe familjar i përgjegjshëm; dhe mbi të gjitha si një shërbëtor publik, që padyshim e kupton se çdo angazhim vjen edhe me çmimin e përbaltjes politike apo edhe me detyrimin e sqarimit të së vërtetës para drejtësisë!Ju jam thellësisht mirënjohës për mbështetjen!

Mezi pres t’u provoj të vërtetën dhe të drejtën e pastër miqve, dhe padyshim armiqve!

Subscribe në YouTube: GAZETA INFOKUSI