Lajme

PDK anëtarësohet në Internacionalen Liberale

Autori: Gazeta inFokus 19:49 | 04 May 2023

Sot, në Ottawa të Kanadasë, në mbledhjen e 206-të të Komitetit Ekzekutiv të Internacionales Liberale (LI), Partia Demokratike e Kosovës, pa asnjë votë kundër, është bërë anëtare me të drejta të plota e kësaj organizate.

Në këtë takim, PDK u përfaqësua nga Sekretari për Marrëdhënie me Jashtë, Bernard Nikaj, i cili shpalosi kërkesën dhe vizionin e PDK-së.

“Pas pranimit vitin e kaluar në LIBSEEN, ALDE dhe sot në Internacionalen Liberale, zyrtarisht, Partia Demokratike e Kosovës bëhet e vetmja parti nga Kosova e cila bëhet anëtare me të drejta të plota në të gjitha nivelet e organizatave më të mëdha politike – rajonale, evropiane dhe botërore.”, thuhet në njoftimin e PDK-së, përcjell Reporteri.net.

-Advertisement-

Internacionalja Liberale është një organizatë e partive liberale dhe demokratike – e cila është themeluar në Oxford në vitin 1947. Aktualisht, Internacionalja Liberale – brenda vetes ka mbi 120 parti politike dhe organizata nga e gjithë bota.

Kryetari i Partisë Demokratike të Kosovës, Memli Krasniqi, ka thënë se ky është një lajm tejet i rëndësishëm për PDK-në.

“Anëtarësimi në Internacionalen Liberale, përveç që plotëson ciklin e ndërkombëtarizimit të PDK-së, fuqizon përkushtimin dhe vizionin tonë për ndërtimin e një shoqërie ku liria individuale, mundësitë e barabarta dhe drejtësia për të gjithë, pa dallim, do të jenë vlerat themelore. Urime të gjithë kolegëve, bashkëpunëtorëve dhe mbështetësve tanë ky lajm kaq i madh dhe i rëndësishëm. Besoni në Kosovë – Besoni në PDK!”, ka thënë Kryetari Krasniqi.

Postimi i plotë:

Subscribe në YouTube: GAZETA INFOKUSI