Sport

Pasiguri për Messin, Pochettino vështirë të grumbullojë për ndeshjen e radhës

Autori: Gazeta inFokus 10:33 | 02 November 2021

I zëvendësuar në pjesën e parë në ndeshjen kundër Lille të premten e kaluar, Lionel Messi nuk ka marrë pjesë në asnjë seancë stërvitore për ekipin e tij parizien. Argjentinasi nuk është rikuperuar plotësisht nga problemi i muskujve dhe gjithashtu rezulton se ka dhimbje në gju. Ky është, në fakt raportimi që bën prestigjiozja “L’Equipe” këtë të martë.

Përballë kësaj situate, stafi i PSG-së mund të vendosë të mos rrezikojë dhe ta përjashtojë nga ndeshja e radhës, kundër Leipzigut, të mërkurën, në kuadër të raundit të katërt të ndeshjeve në grupet e Champions League.

Të premten në mbrëmje, trajneri Mauricio Pochettino kishte siguruar ende se 6 herë fituesi i “Topit të Artë” do të ishte i pranishëm në Gjermani. Situata pa dyshim nuk ka ecur ashtu siç pritej dhe gjithsesi nuk ka arsye për ta rrezikuar “yllin” e skuadrës. Me 7 pikë nga 9 të mundshme, PSG është në një pozicion komod në Grupin A.

-Advertisement-

Gjithsesi, Pochettino pritet të ketë në dispozicion Kylian Mbappenë, i cili është shëruar nga infeksioni në vesh. Gjithashtu rikthehet nga pezullimi edhe Angel Di Maria.