Lajme

Pajaziti për situatën në veri: Kurti hyri në zinxhir të veprimeve të gabueshme

Autori: Gazeta inFokus 18:45 | 05 June 2023

Në lidhje me situatën në veri, anëtari i kryesisë së Partisë Demokratike të Kosovës (PDK), Zenun Pajaziti ka thënë se aktivitetet e gabuara politike kanë prodhuar veprime zinxhirore të gabueshme vazhdimisht, duke përmendur kështu fillimisht tërheqjen e serbëve nga institucionet e Kosovës, pastaj refuzimin e tyre për të marrë pjesë në zgjedhje dhe pastaj situatën aktuale.

Ai në emisionin “FIVE” ka thënë se kryeministri i Kosovës, Albin Kurti ka hyrë në zinxhir të veprimeve të gabueshme kështu duke përmendur fillimisht targat e pastaj veprimet e tjera.

“Aktivitetet e gabuara politike kanë prodhuar veprime zinxhirore të gabueshme vazhdimisht, kemi refuzimin e serbëve të marrin pjesë në institucionet e Kosovës, pastaj refuzimin e zgjedhjeve dhe tash këtë situatë”, ka thënë Pajaziti.

-Advertisement-

Sipas tij, Kurti në këtë proces është i vetëm pasi sipas tij nuk pyet njeri të gjallë.

Ai ndër të tjera ka thënë se skenat e dhunës në veri nuk janë skena që i duheshin Kosovës.

“Skenat, rrethanat e dhunës që i pamë atje janë skena që nuk i duheshin Kosovës, qytetarëve, njerëzve që jetojnë atje, as atyre që na kanë mbështetur e na mbështesin. Kurti në këtë proces është i vetëm pasi sipas tij nuk pyet njeri të gjallë.”, ka vijuar ai.

Ai ka thënë se PDK-ja ka arritur të instalojë institucionet në veri dhe se kjo parti gjithmonë ka mbështetur edhe qeverinë aktuale për vendosjen e sundimit të ligjit në terren.

“Vazhdimisht kemi sugjeruar që të ketë koordinim sa më të mirë me partnerët ndërkombëtarë. I kemi dhënë mbështetje kësaj qeverie, për vendosjen e sundimit të ligjit në terren”.

Ndërsa në pyetjen se a do të marrë pjesë PDK-ja në zgjedhje të jashtëzakonshme, Pajaziti ka thënë se PDK-ja ka marrë pjesë në zgjedhje dhe se kryetarët janë duke kryer detyrat e tyre.

“Nuk është në dorën tonë të bëjmë veprime të tilla. I kemi mbështetur me pjesëmarrje në zgjedhje. Kryetarët janë duke i kryer detyrat në rrethana të cilat janë krijuar”.

Subscribe në YouTube: GAZETA INFOKUSI
Lansohet aplikacioni më i ri i lojalitetit që sjell t’mira pafund Kartela Plus!
-Advertisement-

Të tjera

Fokusi

lajme