Lajme

OKB në alarm: Do të vijë më e keqja për klimën, pasoja katastrofike!

Autori: Gazeta inFokus 08:12 | 17 September 2021

Pa e fshehur shqetësimin, sekretari i Përgjithshëm i Kombeve të Bashkuara, Antonio Guterres, i kërkoi vendeve te nisin menjëherë reduktimin e shpejtë e në shkallë të gjerë të emetimit të gazrave shkaktare të efektit serë.

Është e nevojshme që të shmanget katastrofa klimatike, u shpreh ai i alarmuar. Thirrja e Guterres vjen përpara samitit të klimës që nis muajin e ardhshëm në Glasgou të Skocisë. Në një raport të hartuar nga një sërë agjencish të Kombeve të Bashkuara për çështjen e klimës thuhet se ndryshimet klimatike dhe ndikimet e saj po përshpejtohen.

“Këto ndryshime janë vetëm fillimi i të keqes që pritet të vijë. Qeveritë duhet të përmbushin objektivat që dalin nga marrëveshja e klimës e arritur në Paris në 2015. Nëse nuk ka reduktime të menjëhershme të gazrave serë, pasojat do të jenë katastrofike për njerëzit dhe planetin.”

-Advertisement-

Marrëveshja në fjalë bën thirrje për të kufizuar ngrohjen globale nën 2 gradë Celsius mbi nivelin paraindustrial, dhe aq më mirë nëse kjo mund të ulet afër 1.5 gradë Celsius.

Shefi i OKB-së tha se asnjë vend nuk është i sigurt nga fatkeqësitë natyrore dhe për këtë mori shembull motin ekstrem dhe uraganët vdekjeprurës në Shtetet e Bashkuara, përmbytjet në Europën Perëndimore dhe valët e nxehtësisë në rajonin e Paqësorit.

Subscribe në YouTube: GAZETA INFOKUSI