Ka filluar seanca fillestare ndaj Dardan Krivaqës dhe Arbër Sejdiut, të akuzuar për vrasjen e Marigona Osmanitm në gusht të vitit 2021.

Krivaqën prokuroria e ngarkon me veprën penale vrasje e rëndë dhe dhunim, kurse Sejdiu po akuzohet për veprën penale vrasje e rëndë dhe ndihmë në kryerjen e dhunimit.

Kurse, nga informacionet që Prokuroria thotë se ka marrë nga Policia, vërtetohet se Dardan Krivaqa që nga viti 2006 ka qenë i dyshuar për 133 vepra të ndryshme penale. Edhe Arbër Sejdiu ka disa vepra penale.

Në detajet nga aktakuza e ngritur, thuhet se më 21 gusht 2021, Dardan Krivaqa në banesën e tij pa pëlqimin e tanimë të ndjerës e detyron atë të kryejë marrëdhënie seksuale.

“…me kalimin e kohës për shkak të gjendjes së rëndë shëndetësore si pasojë e dhunës së ushtruar humb aftësinë për të rezistuar, e ku në dy raste në mbrëmje kryen marrëdhënie seksuale pastaj të zhveshur e dërgon në banjë, e ku i vërehen edhe lëndimet në trup”, përshkruan tutje aktakuza, të cilën e ka siguruar “Betimi për Drejtësi”.

I akuzuari tjetër Arbër Sejdiu, akuzohet se me dashje ka ndihmuar në kryerjen e dhunimit nga ana e Dardan Krivaqës. Aktakuza përshkruan se dy të akuzuarit ishin takuar në qytet dhe pasi ishin kthyer bashkë në banesë, Sejdiu ishte në dijeni për dhunimin që po i bëhej tani të ndjerës.

“Po ashtu dhe gjatë asaj kohe përcjell gjendjen nëse ndonjë nga banorët është duke lëvizur aty pari, po ashtu edhe disa herë del nga banesa për të blerë gjëra ushqimore, gjatë gjithë kohës bisedojnë mes vete dhe i jep të pandehurit Dardan Krivaqa telefonin për të thirrë kompaninë e cila menaxhon kamerën, që është e vendosur në korridorin e banesës me qëllim të fshihen video-incizimet, gjegjësisht provat e veprës penale”, thuhet tutje në aktakuzë.

Pas kësaj, sipas aktit akuzues me qëllim të fshehjes së veprës penale “Dhunimi”, e privojnë nga jeta tani të ndjerën Marigona Osmani.

“…në intervale kohore nga ora 10:56 deri në orën 14:43, i pandehuri i parë merr një shkop, e së bashku me të pandehurin e dytë hyjnë në dhomë dhe e godasin në pjesë të ndryshme të trupit, me ç’rast të njëjtës i shkaktojnë, dhimbje të mëdha fizike dhe psiqike, ku nga goditjet pëson politrauma-lëndime të shumëfishta, ku vdekja shkaktohet drejtpërdrejt nga asfiksia mekanike, si dhe shoku hemorragjik dhe traumatik, të cilat janë pasojë e gjakderdhjes së jashtme dhe gjakderdhjes së brendshme, nga thyerje e ashtit të nofullës së poshtme, thyerje e brinjëve, klavikulës së majtë, unazave të qafës, gjakderdhjes epidurale dhe subdurale në pjesën e pasme të trurit të madh dhe në trurin e vogël, këputje parciale të palcës së kurrit në qafë, të njëjtën e dërgojnë në Spitalin e Përgjithshëm – Qendrën Emergjente në Ferizaj dhe largohen nga aty”, thuhet në aktin akuzues.

E gjithë kjo, sipas prokurorisë vërtetohet edhe përmes pamjeve të kamerave të cilat kanë qenë banesën e të akuzuarit Krivaqa. Një kamerë e cila ka regjistruar nga dera e hyrjes së banesës dhe banjo, e njëjta ka pamje edhe të një pjese të derës së dhomës së gjumit, si dhe një dhome të cilën e kapë vetëm një qosh, ku prokuroria thotë se është kryer edhe vrasja.

Pamjet e kamerave, si kishte ndodhur krimi?

Kamerat të cilat kanë regjistruar 24 orë, kanë dhënë një pamje të qartë se si kishte filluar dhe përfunduar tragjikisht e vdekur 18 vjeçarja.

“Më 21.08.2021, ora 02:40, Dardan Krivaqa, pas mesnate derisa është në banjë me të ndjerën Marigona Osmani, e godet me dorë në fytyrë,  04:52, dalin nga banesa, 09:53, i pandehuri Dardan Krivaqa dhe e ndjera Marigona Osmani, kthehen ku vërehet se e ndjera nuk ka kontroll të plotë, i merren mendtë, 10:02, i pandehuri e dërgon në banjë të ndjerën Marigona Osmani, del në ora 10:14, ku vërehet se e njëjta reziston, mirëpo është kapur me duar dhe shtyhet me forcë drejt sallonit, 10:48, e dërgon me forcë në banjë, ku e ndjera është e zhveshur, ndërsa i pandehuri është veshur ku qëndrojnë deri në orës 11:09, kur dalin i pandehuri është zhveshur, dhe të ndjerën me dhunë e nxjerr nga banja dhe e dërgon në dhomën e gjumit”, përshkruhet në aktakuzë.

Tutje, nga ora 13:43, thuhet se i akuzuari i vendos kamerës një kapelë e cila mbulon pamjen deri në orën 19:57.

Pas takimit në mes të akuzuarve të përshkruar në fillim, në orën 23:17 i akuzuari Dardan Krivaqa hynë në dhomën dhe dërgon të ndjerën Marigona Osmani në banjo për ta pastruar, e njëjta ishte e zhveshur dhe kështu vërehej se ka shenja të dhunës në trup.

“Qëndrojnë disa minuta ku gjatë asaj kohe, dera e banjës hapet dhe vërehet se e ndjera e cila ishte e ulur në ulëse të WC, shtrihet dy herë pa ndjenja në tokë, e ku i pandehuri Dardan Krivaqa, e çon dhe e ulë në ulëse të WC-së, rreth orës 23:26, i pandehuri Dardan Krivaqa nga banjë e merr të ndjerën dhe e dërgon në dhomën e tij të gjumit”, bëhet e ditur në aktakuzë.

Në ora 3 të mesnatës, aktakuza thotë se i akuzuari Krivaqa e dërgon serish në banjo të ndjerën për ta pastruar dhe e kthen sërish në dhomë.

Para vrasjes së të ndjerës, thuhet se dy të akuzuarit dalin në korridor duke biseduar dhe më pas kthehen në dhomë, ku Krivaqa në orën 10:56 merr një shkop të zi, kurse i akuzuari tjetër sigurohet për disa minuta nëse po i përgjon dikush dhe më pas kthehet sërish në dhomë ku gjendet Krivaqa bashkë me tani të ndjerën.

“…e mbyll derën dhe aty qëndrojnë nga ora 10:56, e deri në orën 11:13, ku posa del i pandehuri Arbër Sejdiu, ulet në shtrat i cili gjendet në dhomën ngjitur me dhomën ku gjendet i pandehuri Dardan Krivaqa, me të ndjerën Marigona Osmani, 11:22, Arbër Sejdiu, qet aromatizues në korridor, si dhe në dhomën ku gjendet e ndjera, 11:24, Dardan Krivaqa e kthen në radiatorë shkopin e zi, i cili është përdorur gjatë vrasjes, 11:37, Dardani qet aromatizues në korridor dhe hyn në dhomë, del në orën 11:42”, përshkruhet tutje në aktakuzës.

Të akuzuarit thuhet se e kishin thirrë më pas kompaninë e kamerave me qëllim të fshihen video-incizimet nga vendi i ngjarjes. Pasi kishte ecur punëtori i kompanisë, i akuzuari Krivaqa kishte marrë sërish shkopin dhe kishte hyrë në dhomë më pas kishte hyrë edhe i akuzuari tjetër i cili kohë pas kohe kishte dalë në korridor.

Në ora 13:45, i akuzuari Arbër Sejdiu thuhet se kishte dalë nga banesa, kurse 4 minuta më vonë Dardan Krivaqa e dërgon të ndjerën nga dhoma e gjumit në sallon, ku sipas prokurorisë vërehet se të njëjtës i janë hapur sytë dhe nuk ka shenja jete.

Më pas, thuhet se i akuzuari tjetër kthehet me një qese, e merr shkopin dhe e largon nga dhoma. 14:47, është ora që sipas prokurorisë rezulton të jetë edhe koha e vdekjes se të ndjerës, ku të akuzuarit e marrin dhe e lëshojnë në hyrje të Emergjencës dhe largohen nga aty.

Çfarë thotë raporti i autopsisë?

Nofullën e poshtme të thyer, thyerje të brinjëve, thyerje të unazave të qafës, këputje e palcës së qafës, lëndimet të syve, fytyrës dhe pothuajse në çdo pjesë të trupit, janë ato çfarë janë përshkruar në raportin e autopsisë.

Lëndimet e shumta apo siç thuhet në raport ‘politrauma’, kanë bërë që të vihet deri te vdekja e tanimë të ndjerës.

“..,ku politrauma dhe vdekja ka ardhur drejtpërdrejt nga asfiksia mekanike, si dhe shoku hemorragjik dhe traumatik, të cilat janë pasojë e gjakderdhjes së jashtme dhe të brendshme (nga thyerja e ashtit të nofullës së poshtme- mandibullës, pastaj thyerje e brinjëve 2 djathtas dhe 1-3 majtas, klavikulës së majtë, unazave 1-2 të qafës mes tyre, gjakderdhjes epidurale dhe subdurale në pjesën e pasme të trurit të madh dhe në trurin e vogël, si dhe këputjes parciale të palcës së kurrit në qafë, të cilat kanë ardhur nga shtypja, goditjet, apo përplasja nga ndonjë mjet të fortë dhe të rëndë mbetës”, thuhet në raportin e autopsisë.

Kurse, nga dosja e forenzikës, nga ekzaminimi që i ishte bërë trupit pasi kishte arritur në emergjencë përveç tjerave gjatë ekzaminimit të kokës në flokë i ishin gjetur mbetje të imëta të gjethit të tharë pishe, copë druri, në trup kishte mbetje të gjurmëve të goditur nga kabllo, etj.

Në vendin e ngjarjes, sipas prokurorisë janë ekzaminuar edhe detaje tjera, që lidhen me vrasjen e Marigona Osmanit.

Dëshmia e të akuzuarit Arbër Sejdiu

I akuzuari Arbër Sejdiu në dëshminë e tij dhënën për prokurorinë, thuhet se ka thënë se gjatë kohës sa kishte qenë në banesën e Dardan Krivaqës, kohë pas kohe kishte dëgjuar zhurmë, ku sipas tij Krivaqa po i kërkonte të ndjerës llogari për gjoja tradhti, por i njëjti thotë se nuk kishte parë të Dardanin të ushtronte dhunë, por kur e kishte parë në mëngjes dukej se e kishte maltretuar.

“Tutje, thekson se e ka zënë gjumi dhe e ka dëgjuar zërin e Dardanit duke thirrë ku është zgjuar dhe menjëherë ka hyrë në dhomën e Dardanit ku e ka parë të ndjerën Marigona Osmani e cila ishte e shtrirë në krevat lakuriq dhe në trup kishte mavijosje, ndërsa Dardani u mundonte të jepte ndihmën e parë, në ato momente e ndjera nga goja ka vjellë diçka zi. Tutje shton se në ato momente ka kërkuar nga Dardani që ta dërgonin në spital meqenëse kishte përshtypjen se nuk kishte shenja jete e ndjera”, kishte deklaruar ai.

Për këtë deklarate, prokuroria thotë se bie në kundërshtim me filmimet e kamerës në banesën e Krivaqës.

“Pretendimi se ditën dhe kohën e vrasjes ka qenë në gjumë, nuk qëndron pasi nga video-incizimet rezulton se në kohën kur është kryer vrasja ka qenë në dhomën e së ndjerës së bashku me të pandehurin Dardan Krivaqa”, shpegon prokuroria në aktakuzë.

Deklarata e nënës së Marigonës

Valdete Osmani, nëna e tani të ndjerës Marigona Osmanit në dëshminë e dhënë në prokurori ka treguar se vajza e saj ka pasur ndryshime radikale gjatë kohës sa ishte bashkë me tani të akuzuarin Dardan Krivaqën. Ajo thotë se vajzës i kishte parë edhe shenja në trup, por që e ndjera ishte munduar t’i fshehte ato me arsyetime se ka pasur probleme në shkollë.

Për maltretimin që Dardan Krivaqa ia ka bërë të bijës thotë se e mësoi edhe në të pame nga shoqet e saj, të cilat edhe e kishin sugjeruar që të njëjtin ta lajmëronte në Polici e t’i tregonte familjes.

Në ditën kritike, thotë se kishin tentuar që gjithë ditën ta merrnin në telefon, ndërsa në mbrëmje kishte marrë lajmin për vdekjen e të bijës për të cilën fillimisht kishte menduar se ka vdekur në aksident trafiku.

Ndërkaq, ajo dyshon se Krivaqa vajzën edhe e ka trafikuar pasi këtë ia kishin thënë edhe shumë njerëz tjerë.

Ajo përveç tjerash, sipas aktakuzës, ka deklaruar se tani ka frikë edhe për fëmijët e tjerë pasi nëna e Dardan Krivaqës sipas saj i ka thënë se ka njerëz të njohshëm në nivele të larta.

Përveç këtyre, prokuroria ka marrë edhe dëshminë e punëtorit të kompanisë se kamerave, i njëjti ka thënë se atë ditë gjatë kohës së qëndrimit të tij nuk ka dëgjuar ndonjë zhurmë, por ka ndjerë një aromë të pakëndshme.

Dëshmi në prokurori ka dhënë edhe djali i dajës së Dardan Krivaqës, i cili sipas aktakuzës, ka thënë se prej kohës kur i akuzuari bashkëjetonte me tani të ndjerën asnjëherë nuk ka shkuar në banesën e tij.

Me gjithë provat e mbledhura, prokuroria Dardan Krivaqën po e akuzon për “Dhunim” nga neni 227, par.4, nënpar 4.1 lidhur me par. 1 të KPRK-së. Kurse, Arbër Sejdiu akuzohet për veprën penale “Ndihmë në kryerjen e dhunimit”, nga neni 227, par 4, nënpar 4.1, lidhur me par. 1 dhe nenin 33 të KPRK-së.

Kurse, të dy akuzohen se në bashkëkryerje kanë kryer veprën penale “Vrasje e rëndë”, nga neni 173, par. 1, nënpar.1.3 dhe 1.7, lidhur me nenin 31të KPRK-së.

Prokuroria nuk ka gjetur asnjë rrethanë lehtësuese dhe po kërkon që të njëjtit të dënohen sipas ligjit. 

BKT Kosova vlerësohet për herë të katërt "Banka e Vitit 2024 në Kosovë" nga The Banker

Sponsoruar