Musliu e pyet nëse ende mendon se “familjarët janë për dasma”, Kurti: S’do të thotë t’i persekutojmë apo t’i largojmë nga Kosova
Autori: Gazeta inFokus
15:15 | 19 November 2026
Deputetja e Partisë Demokratike të Kosovës, Ganimete Musliu e pyeti kryeministrin Albin Kurti se a mendon sikur dikur se “farefisi dhe familjarët janë për dasma, e jo për institucione”.
Musliu po i referohej punësimeve të familjarëve të zyrtarëve të lartë qeveritarë nëpër institucione.
“Zoti Kurti, në vitin 2019, gjatë fushatës zgjedhore, patët deklaruar publikisht se farefisi dhe familjarët janë për dasma, e jo për institucione. Pyetja ime konkrete është: a mendoni edhe sot ashtu, a e keni atë qëndrim apo qëndrimi juaj ka ndryshuar?” pyeti ajo.
Kurti, pasi mori fjalën, fillimisht saktësoi se atë deklaratë e kishte bërë “jo në vitin 2019, por në vitin 2021”.
“Ju e keni shkurtuar deklaratën në pak fjalë, por unë i qëndroj prapa asaj. Luftim i korrupsionit dhe nepotizmin pa asnjë koncesion apo kompromis”, tha ai.
“Nëse e mbani mend dekadën e kaluar, në top tri brengat kryesore të qytetarëve të Republikës kanë qenë rregullisht, nga viti në vit, madje nga muaji në muaj, korrupsioni dhe papunësia. Sot korrupsioni dhe papaunësia nuk janë në top 3, as në top 5 më”, tha Kurti.
“Dhe çka ua merr mendja? Pse korrupsioni më nuk është në top 5 brengat kryesore të qytetarëve të Republikës? Sepse ruhet paraja publike dhe nuk ka më për tendera as ryshfet në fillim, as haraç në fund”, shtoi kryeministri.
Kurti tha se kishte thënë se në institucione duhet të vijnë “njerëz të ndershëm e të dijshëm, patriotë e profesionistë”, por jo “dikush që s’ka familje, as farefis”.
“Ajo çfarë kam thënë unë është që në përfaqësimin politik e institucional duhet të vijnë njerëz të ndershëm e të dijshëm, patriotë e profesionistë, e këto të jenë kriteret themelore, e kurrsesi familja apo prejardhja farefisnore. Unë nuk kam thënë që duhet të vijë dikush që s’ka familje, as farefis, por unë kam thënë që mos me qenë familja dhe farefisi lidhja, kushti dhe mundësia nëpërmjet së cilës dikush punësohet. Tash, kjo nuk nënkupton që do të duhej familjarët e farefisin e secilit ta persekutojmë apo largojmë nga Kosova dhe gjithashtu, kur kam thënë që ‘familja është për dasma e aheng’, kam thënë që ‘veç në dasma e ahengje dikush të thërret sepse të ka familjar apo mik’. Pra, kriteri kryesor është afërsia familjare. Ndërkaq në punë e punësim, ky nuk do të duhej dhe nuk është më kriter qysh ka qenë”, tha ai.
Kurti tha se familjarët e tij nuk janë avancuar që kur ai u bë kryeministër i vendit.
“Ma gjeni një Kurti që u avancu ndokund. Absolutisht nuk mund ta gjeni asnjë që për shkak të lidhjeve me mua përparoi diku”, tha ai.
Pasi deputetja Musliu ia numëroi punësimet, Kurti insistoi se “dukuria e nepotizmit dhe korrupsionit nuk ekziston më në Kosovë”. Tha se “këtë e thonë edhe raportet vendore, edhe ndërkombëtare”.
“Për emrat që i lexuat ju, do të duhej të na tregonit cili prej emrave nuk ka qenë në krye të listës kur është angazhuar dhe që lidhja familjare paska bërë që t’i kapërcejë ata që kanë qenë më të zotë dhe personi në fjalë qenka punësuar. Kjo është pyetja. Nuk është pyetja me na i lexu kënd i kemi anëtarë të familjes… Nuk është keq edhe me i mësu, a kuptoni? Por nuk kam unë kurreshtje për këtë punë”, tha ai.

T� tjera
-
Haxhiu: Jam pranë Jakup Krasniqit, do të vazhdojmë betejën në Apel
Kryetarja e Kuvendit të Kosovës, Albulena Haxhiu, ka reaguar pas vizitës së J...
-
Rrahmani e pyet Kurtin për Kodin Civil dhe fertilizimin, kryeministri: S’ka qeveri që ka bërë më shumë për familjen
Në Kuvend të Kosovës është duke vazhduar seanca plenare. Përgjatë kësaj se...
-
Drejtoresha e Mirëqenies Sociale në Pejë dëshmon nesër në Komisionin Hetimor për rastin Arlinda Zekaj
Drejtoresha e Drejtorisë për Mirëqenie Sociale në Komunën e Pejës, Albulena M...
-
Bosnja ia ndalon hyrjen Radoiçiqit, e cilëson kërcënim për sigurinë kombëtare
Millan Radoiçiqit, i dyshuar për organizimin e sulmit në Banjskë, në veri të ...
-
Ish-asistentja e deputetes së VV-së, Shqipe Metaj-Isufi, punësohet në Ministrinë e Punëve të Brendshme
Albana Bucaliu, ish-asistente e deputetes së legjislaturave të mëparshme së L...
-
Kurti kritikon Gjykatën Speciale: Është monoetnike dhe pa transparencë
Kryeministri i Kosovës, Albin Kurti, ka kritikuar Gjykatën Speciale, duke e c...
-
Haradinaj: Sponzorizuesit e ligjit për Gjykatën Speciale dhe tërheqësit e tij, s’po dinë as çfarë kanë bërë e as çfarë po bëjnë
Daut Haradinaj, ka reaguar lidhur me Gjykatën Speciale, duke kritikuar person...
-
Tahiri: Kosovën e ka mbuluar terri, qytetarët po hyjnë borxhe për t’i paguar faturat e rrymës
Besnik Tahiri, ka kërkuar ndryshimin e politikave energjetike gjatë seancës s...
-
“U dënua padrejtësisht”, Arbërie Nagavci: Pamjet e Jakup Krasniqit ishin të dhimbshme
Shefja e Grupit Parlamentar të LVV-së, Arbërie Nagavci, deklaroi se pamjet e ...
-
Tender 16 mijë e 800 euro me i qa drutë – Komuna e Gazmend Muhaxherit jep kontratën
Zakonisht, drutë për ngrohje nga institucionet blihen të përgatitura dhe të g...
-
VV-ja shton pika të reja në rend dite, në mesin e tyre edhe ajo për masat për importin e rrymës nga Serbia
Kuvendi i Kosovës ka votuar për ndryshimin e pikave të rendit të ditës, të pa...
-
Murati dorëzon kallëzim penal ndaj Përparim Ramës për 2.2 milionë euro
Hekuran Murati ka njoftuar se ka dorëzuar kallëzim penal në Prokurori ndaj kr...


































