Lajme

Murati: Çkado që kërkohet për veriun e Kosovës, të kërkohet edhe për Kosovën Lindore

Autori: Gazeta inFokus 18:56 | 11 August 2022

Kryetari i Lëvizjes për Bashkim, Valon Murati, duke folur për tensionet e fundit në veri të Kosovës më 31 korrik dhe për deklaratën e kryeministrit të Kosovës, Albin Kurti se mund të kishte përshkallëzim të situatës, ka thënë se në këto rrethana nuk mund të ketë luftë klasike në mes të Kosovës dhe Serbisë e as agresion tipik.

Murati ka deklaruar se problemi i veriut është problem i thellë politik që nuk zgjidhet me ushtri dhe polici, por me ndërhyrje politike.

Ai ka thënë se prej vitit 2011, kur kanë filluar bisedimet, është gabim i rëndë nga ana e Kosovës që nuk e kanë shtruar problemin e Kosovës Lindore.

-Advertisement-

“Pra në radhë të parë duhet të vendoset parimi i reciprocitetit, çkado që kërkohet për veriun e Kosovës duhet të kërkohet edhe për Kosovën Lindore”, ka thënë Murati.

Ndërsa për Asociacionin e Komunave me shumicë serbe, ai ka thënë se nuk duhet të lejohet në Kosovë sepse është një mekanizëm që grumbullon komunat në një mekanizëm të vetëm dhe ky mekanizëm fillon të marrë kompetenca, të cilat i bartin në asociacion dhe bien në konflikt me institucionet e Kosovës.

“Edhe kur Asociacioni pa kompetenca ekzekutive, është një gur i rëndë për funksionalitetin e Kosovës”, ka theksuar ai.

Sipas tij, asnjë zgjidhje me Serbinë, nuk duhet të jetë populiste.

Ai ka thënë se qasja e kryeministrit të Kosovës, Albin Kurti është qasje populiste, të cilën e ka pasur në fillim kur ka ardhur në pushtet dhe po vazhdon ta mbajë ende.

Për Muratin, një qeveri e cila ka 51 për qind të legjitimitetit, duhet të udhëheqë Kosovën për të zgjedhur probleme të mëdha.

“Deri sa të gjejmë zgjidhje me Serbinë, ajo është çështje e madhe për Kosovën”, ka shtuar ai.

Sipas tij, Serbia nuk do ta njohë Kosovën dhe këto çështje që janë probleme të mëdha për Kosovën, siç thotë ai, duhet të diskutohen në takimet e ardhshme në Bruksel./Dukagjini/

Subscribe në YouTube: GAZETA INFOKUSI
Comodita Home nis epokën e franshizës në Belgjikë
-Advertisement-

Të tjera

Fokusi

lajme