Deputeti i vetëm shqiptar në Parlamentin e Serbisë, Shaip Kamberi, ka thënë se dorëheqja e kryeministrit serb, Millosh Vuçeviq, pas dy muajsh protestash të studentëve, duhet parë me kujdes.

Në një shkrim në Facebook, Kamberi ka thënë se dorëheqja e Vuçeviqit vjen në kohën kur Serbia po përballet me disa sfida.

“…nga disfata në Kosovë pas sulmit terrorist në Banjska, mundësisë së përfshirjes në sulmin tjetër terrorist në infrastrukturën kritike të Kosovës, presionet e brendshme për reforma zgjedhore, deri te presionet ndërkombëtare në rritje ndaj politikës së jashtme të Vuçiqit të ekuilibrimit në katër karrige (BE, Washington, Moskë e Pekin)”, ka shkruar ai.

-Advertisement-

Kamberi ka ngritur pikëpyetjen se çka fshihet pas dorëheqjes, mbledhjes së jashtëzakonshme të presidentit Aleksandar Vuçiq me Qeverinë dhe dorëheqjen e kryetarit të Novi-Sadit.

Duke komentuar themelimin e “Lëvizjes për Shtetin” nga Vuçiqi, Kamberi ka thënë se është përpjekje e tij për t’u shpërlarë nga partia e tij SNS “në të njëjtën formë dhe model qysh ishte shpërlarë nga Partia Radikale serbe e Vojisllav Sheshelit, me premtimin se me ndërrimin e petkut do të ndryshojë edhe ideologjinë politike radikale të hegjemonisë serbe”.

“Doli se Vuçiq, si një radikal hegjemonist i përbetuar, me premtime boshe ndaj Perëndimit, vetëm se kishte blerë kohë vazhdimisht, për ta forcuar pushtetin e tij në Serbi, duke degraduar në skajshmëri lirinë e fjalës dhe shumë liri të tjera qytetare, sidomos duke shndërruar në normë dikriminimin e pakicave sidomos të shqiptarëve. Konfliktuoz me fqinjët, me pretendime hegjemoniste përmes “Botës serbe” ndaj shteteve përreth, Vuçiq është shndërruar në pengesën kryesore për paqen e qëndrueshme në Ballkan. Në të njëjtën kohë, “pastrime politike” shtojnë një tjetër dimension në këtë tablo të ngarkuar politike. Politizimi i institucioneve dhe zëvendësimi i punonjësve ekzistues me persona të lidhur me parti specifike janë shqetësime që prekin jo vetëm administratën shtetërore e lokale, por edhe gjithë sistemin e qeverisjes dhe sistemin gjyqësorë”, ka shkruar Kamberi.

Tek ka bërë thirrje që lëvizjet e fundit në Beograd të shihen me kujdes, ai ka thënë se edhe pse Vuçiqi po duket i dorëzuar ndaj kërkesave të protestuesve “me gjasë, po përgatit një skenarë të i për daljen nga kriza duke ‘flijuar’ kështu bashkëpunëtorët e vet të afërt”.

Deputeti ka thënë se në ditët në vijim do të vërtetohet nëse është “era e ndryshimeve” ajo që po fryn në Beograd apo taktikë e re e Vuçiqit për heqjen e presionit.

Tutje ai ka thënë se demokratizimi i Serbisë duhet të nisë me reforma në sistemin zgjedhor dhe atë të drejtësisë, me ballafaqimin me të kaluarën sikurse pranimin e krimeve të luftës dhe për liritë qytetare si dhe për të drejtat e pakicave.

Të martën, Vuçeviq dha dorëheqjen pas muajve të protestave nga studentët që po kërkojnë përgjegjësi nga shteti për vdekjen e 15 personave në Novi-Sad nga shembja e një çatie të stacionit hekurudhor në këtë qytet.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-