Rozë

Motrat Berisha përballen me drejtësinë, pritet vendimi për plagosjen e Klea Prengës

Autori: Gazeta inFokus 16:54 | 02 October 2025

Dy motrat Berisha, Antonela dhe Mariela, janë paraqitur sot në Gjykatën e Tiranës, ku pritet të jepet vendimi përfundimtar ndaj tyre lidhur me ngjarjen e ndodhur gjatë verës së vitit 2024, kur Klea Prenga, 26 vjeçe, u plagos rëndë pas një konflikti fizik.

Ngjarja, e cila pati tërhequr vëmendje të gjerë publike dhe mediatike, ndodhi në muajin korrik të vitit të kaluar, kur mes vajzave shpërtheu një përplasje fizike që përfundoi me përdorim dhune dhe pasoja të rënda për njërën prej tyre.

Çfarë ka kërkuar Prokuroria?

-Advertisement-

Sipas burimeve zyrtare nga Prokuroria e Tiranës, është kërkuar një dënim me 3 vite burg për Mariela Berishën, e cila aktualisht ndodhet nën masën e sigurisë “arrest në shtëpi”. Prokurori ka argumentuar se ajo ka pasur rol aktiv dhe të drejtpërdrejtë në plagosjen e Klea Prengës.

Duke qenë se pala mbrojtëse ka kërkuar gjykim të shkurtuar, në rast të shpalljes fajtore, dënimi i saj mund të reduktohet në 2 vite burg, në përputhje me legjislacionin penal në fuqi.

Për motrën tjetër, Antonela Berisha, prokuroria ka kërkuar 3 vite shërbim prove, një formë dënimi alternative që parashikon mbikëqyrje të të dënuarit pa vuajtje direkte të burgut. Edhe në këtë rast, nëse pranohet gjykimi i shkurtuar, dënimi mund të ulet në 2 vite prove.

Akuzat ndaj motrave: “Plagosje e rëndë me dashje” në bashkëpunim

Të dyja motrat përballen me akuzën e rëndë të “plagosjes së rëndë me dashje”, kryer në bashkëpunim, një vepër penale që dënohet me disa vite burgim sipas Kodit Penal të Republikës së Shqipërisë.

Motrat Berisha përballen me drejtësinë, pritet vendimi për plagosjen e Klea Prengës - Insajderi - motrat 1 berisha

Pas disa javësh kërkimi nga policia, Antonela dhe Mariela Berisha u vetëdorëzuan në tetor të vitit 2024, duke vendosur t’i nënshtrohen hetimit nën masa sigurie më të lehta, të ndryshme për secilën.