Klubi i Real Madrid zyrtarizoi mbrëmjen e së hënës afrimin për pesë sezone të yllit francez, sulmuesit Kylian Mbappe.

Pas konfirmimit të momentit të shumë pritur nga ana e tifozerisë madrilene, e gjithë vëmendja kthehet te shifrat: Sa do të përfitojë Mbappe në pesë vite dhe sa do të shpenzojë Real-i?

Mediet spanjolle raportojnë se sulmuesi francez do të përfitoi një bonus nënshkrimi prej 125 milionë euro, të cilin do ta marrë të ndarë në pesë vite, plus 20 milionë euro neto në vit në pagë.Këto janë shifrat, siç shkruan shtypi spanjoll dhe ndërkombëtar, të marrëveshjes që bënë të mundur këtë transferim

Shifrat “astronomike”, pra jo të arritshme për të gjithë, por kalimi i fenomenit francez te “Los Blancos” do të gjenerojë shuma aq të “frikshme” sa do t’i lejojë Real-it, jo vetëm të kompensojë shpenzimet për të, por edhe të shtojë shumë më shumë të ardhura në arkë.

Mediet spanjolle shpjegojnë se ashtu si transferimi i Cristiano Ronaldo-s te Real Madrid në vitin 2009, për 94 milionë euro, që thuajse i kompensoi dyfishin e kësaj shifre klubit madrilen, e njëjta gjë do të ndodhë tani edhe me Mbappe-n.

Pa sulmuesin francez, Real-i kishte një xhiro prej 400 milionë euro në 2023-shin, shifër e cila tani është e destinuar në mënyrë të pashmangshme të rritet. Menjëherë të paktën 100 milionë euro, sipas llogarive të ekspertëve, duke përfshirë sponsorët, tregtimin (kërkesa për fanellat e Mbappe-së) dhe reklamat përmes rrjeteve sociale, do t’i shtohen klubit spanjoll.

Mbappe ka edhe sponsorë personalë si Nike, Hublot dhe Oakley, të cilët vlejnë të paktën 20 milionë në vit dhe Real-i do të mbledhë pjesën e të drejtave të imazhit të lojtarit, që ia rezervoi vetes gjatë negociatave.

Zakonisht klubi i “Los Blancos” u jep lojtarëve të tij 50% të të drejtave, por në rastin e Mbappe, francezi ka marrë një përqindje më të lartë gjatë fazës së negociatave.

Megjithatë, duhet shtuar se nga transferimi i ish-sulmuesit të Paris Saint-Germain do të përfitojnë edhe sponsorët aktualë të Real Madrid-it, të cilët do të kenë një përfitim ekonomik, që gjithashtu do të jehojë në klub dhe do të bëjë që marka e Real Madrid të rritet edhe më shumë në të gjithë botën.

Për më tepër, transferimi i Kylian Mbappe në klubin e kryeqytetit spanjoll do të nënkuptojë gjithashtu “konsum” më të madh të ndeshjeve nga shikuesit dhe të ardhura më të mëdha për Real Madrid-in dhe La Liga, për sa i përket të drejtave televizive.

Comodita Home dhe Prince Caffe: Sponsor të përgjithshëm të Sunny Hill Festival

Sponsoruar