Këto javët e fundit, kemi qenë dëshmitarë të një numri të madh të njerëzve që janë akuzuar për ngacmime seksuale apo sjellje të pahijshme.

Reagimi i parë i shumicës së tyre ka qenë mohimi dhe debati, por kur dëshmitë fillojnë të dalin në pah, ajo strategji bëhet më e vështirë për t’u ndjekur, transmeton Telegrafi.

E pikërisht atëherë vjen koha kur njerëzit fillojnë të kërkojnë falje publike – kryesisht një qëndrim rreth veprave të tyre duke pranuar se i kanë lënduar tjerët.

Shpresojmë se asnjëherë nuk do të jeni në pozitë për t’iu përgjigjur akuzave të tilla, por të gjithë ne bëjmë gjëra për të cilat pendohemi dhe, me qëllim apo jo, i lëndojmë tjerët.

Megjithatë një kërkim falje e dobët dhe e pasinqertë më shumë mund të sjellë dëme sesa dobi. Kështu, duke pasur parasysh këtë, herën tjetër që e gjeni veten në pozitë për të kërkuar falje, keni parasysh:

KËTO JANË MËNYRAT E GABUARA PËR TË KËRKUAR FALJE:

Fajësimi i tjerëve
Një nga gjërat më të këqija që mund ta bëni është t’ia hidhni fajin dikujt për veprën, sjelljen e keqe apo mungesën e profesionalizmit nga ana juaj.

Të arsyetoheni
Kur përpiqeni ta mbroni sjelljen tuaj duke pohuar se është e arsyeshme, ju vetëm sa e bëni situatën të duket më e keqe.

Ta minimizoni veprën
Kur flisni sikurse vepra që e keni kryer nuk ka qenë aq e dëmshme sa thonë tjerët, ju dërgoni mesazh se efektet e sjelljeve tuaja te tjerët nuk kanë rëndësi.

MËNYRA E DUHURA PËR TË KËRKUAR FALJE:

Pranojeni gabimin
Bëhuni i/e pari që pranon se keni bërë diçka të gabuar; mos e mohoni e as mos krijoni debate. Kur kërkoni falje, ju jeni duke e pranuar se keni kryer sjellje të papranueshme. Është vepër e cila ju ndihmon ta rindërtoni besimin dhe t’i riktheni lidhjet.

Merrni përgjegjësi të plotë
Kur merrni përgjegjësi të plotë për situatën e caktuar, ju ia riktheni dinjitetit personit që e keni lënduar. Kjo mund të jetë fillimi i procesit të shërimit dhe mund ta ndalë çdo akuzë nga viktima. P.sh.: “Më vjen keq që t’i lëndova ndjenjat dje kur të fola ashpër. E di se të kam turpëruar, e veçanërisht pasi e tërë ekipa ka qenë aty. Kam gabuar që të kam trajtuar ashtu dhe të kërkoj falje”.

Ndryshoni
Përderisa është e rëndësishme të kërkoni falje, mbani mend se personi tjetër mund të mos jetë gati për t’iu falur. Jepni kohë dhe mos e nxitoni këtë proces. Ndërkohë, mendoni me kujdes hapat që mund t’i merrni për t’i ndihmuar tjetrit. Gjestet e pasjellshme apo premtimet e zbrazëta më shumë bëjnë dëme sesa mirë – kështu, nëse keni premtuar se do të ndryshoni për mirë, bëjeni këtë.

PSE KA RËNDËSI KËRKIMFALJA?

Duke kërkuar falje në mënyrë të duhur kur e keni lënduar dikë me qëllim apo gabimisht, është hapi i parë drejt rikthimit të lidhjes mes juve dyve. Nëse nuk kërkoni falje apo nuk kërkoni falje në mënyrën e duhur, ju vetëm i shkaktoni dëme lidhjeve tuaja afatgjate, reputacionit tuaj dhe mundësive të karrierës! Më e rëndësishmja, ju e humbni respektin nga tjerët.

Të gjithë ne gabojmë dhe i lëndojmë tjerët – dhe kur kjo të ndodh, një kërkim falje e sinqertë dhe e menduar mirë është hapi më i mirë për rikthimin e integritetit.

Black Friday ne Artmotion

Sponsoruar