Rozë

Mbrëmja e madhe e ndarjes së çmimeve të muzikës “pushtohet” nga artistet shqiptare

Autori: Gazeta inFokus 12:28 | 10 November 2022

Mbrëmja e madhe e ndarjes së çmimeve të muzikës, “MTV Europe Music Awards 2022” do të mbahet të dielën. Mesa duket në këtë mbrëmje çmimesh pritet të bëjnë histori shqiptarët.

Kjo për shkak se që nga prezantuesja, performuesit e deri te të nominuarit – janë artistë me origjinë shqiptare.

Prej kohësh është thënë se Rita Ora me bashkëshortin e saj, Taika Waititi, do të jenë prezantues të eventit. Por jo vetëm kaq, pasi dy artistet e tjera shqiptare, Bebe Rexha dhe Ava Max, do të performojnë hitet e tyre më të fundit.

-Advertisement-

Rexha dhe Max janë nominuar gjithashtu edhe për çmimin “bashkëpunimi më i mirë”. Në garën për të marrë këtë çmim iu është bashkuar edhe ylli tjetër shqiptar me famë botërore, Dua Lipa. Bebe është nominuar për bashkëpunimin e saj me David Guettan, “I’m good (Blue)”.

Ndërsa sa i përket Ava-s, ajo është nominuar për bashkëpunimin me DJ Tiwsto, “The Motto”, nga ana tjetër Dua për bashkëpunimin “Sweetest Pie” me Megan The Stallion.

Kjo është hera e parë që tre shqiptare garojnë për të njëjtin çmim. Të nominuar për këtë çmim janë edhe shumë artistë të tjerë me famë botërore.

Kujtojmë se në një intervistë që dha pak kohë më parë, Ava Max foli për artistet e tjera shqiptare që kanë korrur sukses në tregun ndërkombëtar, duke thënë:

“Ato janë të gjitha kaq të talentuara por unë mund të flas vetëm për veten time. Duke parë prindërit e mi duke luftuar më bëri të mendoj, “si e bënë prindërit e mi?” Nuk kam marrë kurrë jo për një përgjigje. Kjo është e vetmja zgjedhje. Nuk kisha një plan B”.

Mbrëmja e madhe e ndarjes së çmimeve të muzikës

Gjithashtu sjellim në vëmendje se raporti i Rita Orës me Dua Lipën është përfolur gjatë në mediat botërore. Fillimisht ishte një intervistë e këngëtares Bebe Rexha që nxiti dyshimet që raportet mes Duas dhe Ritës nuk janë të mira.

Deri më tani ajo që aludohet si shkaku i zënkës është mungesa e mbështetjes nga Rita për Duan kur ajo ishte në fillim të karrierës. Si duket Dua nuk ka mundur ta falë.