Ministria e Arsimit, ka bërë të ditur për Radio Kosovën se kompensimi i orëve të humbura si pasojë e grevës, do të bëhet sipas kalendarit të përmirësuar.

Ndërkohë, Sindikata e Arsimit dhe Këshilli i Prindërve janë shprehur kundër kompensimit të orëve sipas kalendarit të ri, pasi kjo është e rregulluar me Kontratë Kolektive.

Orët e humbura si pasojë e grevës në arsim do të kompensohen sipas kalendarit të ri, i cili është publikuar nga Ministria e Arsimit, Shkencës, Teknologjisë dhe Inovacionit (MASHTI). Këtë e ka bërë të ditur Ministria e Arsimit në një përgjigjeje me shkrim për Radio Kosovën. Në përgjigje thuhet se ministria gjatë rishikimit të kalendarit shkollor, ka analizuar me kujdes të gjithë faktorët, përfshirë përmbajtjen mësimore për gjysmëvjetorin e parë dhe të dytë, balancimin e periudhave mësimore dhe shmangien e mbingarkesës. Si rezultat i këtyre analizave ka ardhur deri te vendimi për plotësimin dhe ndryshimin e kalendarit shkollor. Për sa i përket propozimeve që kompensimi i 22 ditëve të humbura të bëhet duke shtuar nga 5 orë brenda javës për çdo nxënës, kjo praktikisht dhe teknikisht është e pamundur të realizohet si nga aspekti pedagogjik, ashtu edhe ai logjistik.

Ndërkohë, kundër këtij vendimi të ministrisë është Sindikata e Arsimit. Ymer Ymer, nga kjo sindikatë, i tha Radio Kosovës se orët e humbura gjatë kohës së grevës në këtë sektor nuk kompensohen, për arsye se kështu është e rregulluar me Kontratë Kolektive.

“Këtë çështje e kemi të rregulluar me Kontratë Kolektive e e cila është e nënshkruar ndërmjet MASHT-it dhe SBASHK-ut. Një nën i cili thotë se orët e humbura gjatë kohës së grevës në këtë sektor nuk mbahen ose kompensohen përveç nëse ka një marrëveshje të veçantë ndërmjet të dyja palëve. Ministria e Arsimit as nuk ka biseduar dhe nuk e ka ftuar SBASHK-un për ndonjë konsultim për arritjen e ndonjë marrëveshje. Përderisa nuk ka një marrëveshje të tillë, ne, mendojmë, se ai vendim për zëvendësimin e orëve është i pavlefshëm”, tha Ymeri.

Po ashtu, edhe Këshilli i Prindërve të Kosovës është shprehur kundër kompensimit të orëve ditëve të shtuna. Kryetari i Këshilli, Jeton Demi, në një përgjigjeje për Radio Kosovën tha se prindërit në mënyrë unanime janë deklaruar kundër kompensimit të orëve pasi kjo po shkakton çrregullim të planifikimit familjar dhe aktiviteteve të tjera.

“Të shtunat ligjërisht janë ditë pushimi, mbajtja e mësimit ditëve të shtuna e pengojnë procesin mësimor gjatë ditëve të tjera të javës. Po ashtu pengojnë aktivitetin jashtë shkollor të fëmijëve. Dhe po ashtu shumica dërrmuese e prindërve kanë qenë kundër kompensimit të orëve gjatë të shtunave dhe vazhdojmë të mbajmë këtë qëndrim”, tha Demi

Ministria e Arsimit ka bërë të ditur se gjatë një muaji të grevës, janë humbur gjithsej 22 ditë mësimi apo rreth 12 për qind e ditëve të vitit shkollor.

Marsi sjell Magji në ETC

Sponsoruar