Sport

“Mallkimi” gjysmëfinale e ndjek sërish, Guardiola: Goditje e fortë! Ishim kaq afër finales…

Autori: Gazeta inFokus 10:14 | 05 May 2022

Manchester City dhe Pep Guardiola ishin me një këmbë në finalen e Champions League, por përballë Realit të këtij sezoni nuk mund të bësh kurrë llogari apo të jesh i qetë, edhe pse mund të jetë minuta e fundit e ndeshjes.

Kampionët e Anglisë përjetuan një mbrëmje horror në “Santiago Bernabeu”. Tre gola të pësuar brenda pesë minutave dhe lamtumirë ëndrra finale kundër Liverpoolit. Guardiola e pranon se eliminimi dramatik është i vështirë për t’u pranuar.

“Në pjesën e parë nuk luajtëm futboll, na mungoi loja, nuk kishim vazhdimësi dhe rrjedhshmëri në lojë. Më pas e morëm veten dhe në momentin tonë më të mirë kishim mundësi të dërgonim rezultatin në 2-0 për ne. E kishim gjithçka nën kontroll.

-Advertisement-

Ata futën lojtarë të freskët dhe morën më të mirën. A e mendova të kryer kalimin në finale? Jo, për shkak të përvojës së madhe që kam në këtë kompeticion, por sa keq! Ishim shumë afër finales…

Realit i duheshin dy gola, por ata janë të aftë për ta bërë një përmbysje të tillë, historia e tyre flet qartë. Urime Realit dhe Liverpoolit për kualifikimin në finale.

Pësuam një goditje të fortë, e pranoj. Nuk e di nëse meritonim diçka më shumë. A më mungon trofeu i Champions League? As këtë s’e di… Kemi zhvilluar gjëra të jashtëzakonshme së bashku, jam i lumtur te Manchester City”, deklaroi trajneri spanjoll.

Guardiola regjistroi eliminimin e gjashtë në gjysmëfinalet e Champions League. Dy herë i ndodhi kur ishte trajner i Barcelonës (2010, 2012), tre herë me Bayern Munchen (2014, 2015, 2016) dhe tani me Cityn (2022).

Subscribe në YouTube: GAZETA INFOKUSI
Etiketa:

Të tjera

Fokusi

sport