Sport

Magani me kritika ndaj lojtarëve të tij

Autori: Gazeta inFokus 17:52 | 21 April 2018

Pas një super-ndeshje xhiron e kaluar ndaj Vëllaznimit, Trepça ’89 dështon totalisht në sfidën vijuese ndaj Gjilanit, duke humbur 2:0.

Trajneri i ekipit mitrovicas, Gugash Magani thotë se kjo ishte një paraqitje shumë e dobët e djelmoshave të tij.

“Sot unë do ta quaja si një ndeshje shumë të dobët tonën edhe pse mendoj që patëm momentet tona. Në përgjithësi nuk patëm grintën dhe urinë që e kishim në ndeshjet e fundit. Mirëpo, që ta mbash skuadrën të ketë uri gjatë gjithë kohës duhesh të kesh futbollistë që të luajnë”, deklaroi Magani për SuperSport.

LEXO EDHE: Ja si duket tabela e Superligës pas takimeve të zhvilluara sot

-Advertisement-

Ai vijoi edhe me disa kritika, gjithsesi duke u nisur nga vetja.

“Unë kam marrë përgjegjësitë e mia padiskutim, por ajo që më bën pak të mërzitem është se disa nga lojtarët që kam pritur, nuk dhanë atë që që pritej. Gjilani e meritoi fitoren edhe pse unë kam një pretendim sa i përket golit të anuluar. Edhe pse nuk mund të flas me korrektësi nga pozita që isha, mendoj që ishte gol. Kjo i takon asistentit. Gjithsesi, nuk mund të mohoj meritat e Gjilanit që e fitoi ndeshjen”, shtoi Magani.

Sipas tij, mbrojtja sot nuk funksionoi si duhet. “Patëm një ndryshim sot në qendrën e mbrojtjes sepse Lladrovci ishte i padisponueshëm dhe inkuadruan Memimin që ishte larg pritjeve të mia. Në momente të veçanta disa lojtarë duhet të marrim në shumë përgjegjësi”, përfundoi Magani.

Me këtë humbje, 89-shi kalon në pozitën e gjashtë.

Subscribe në YouTube: GAZETA INFOKUSI