Lajme

Lushaku-Sadriu: Në LDK gratë janë vendimmarrëse

Autori: Gazeta inFokus 13:35 | 25 January 2025

Kryetarja e Forumit të Gruas së Lidhjes Demokratike të Kosovës, njëherit kandidatja për deputete, Jehona Lushaku-Sadriu, ka vizituar sot Obeliskun e grave “Heroinat” së bashku me gratë e LDK-së, duke nderuar kontributin dhe sakrificën e grave kosovare në luftën për liri dhe barazi.

Gjatë vizitës, Lushaku-Sadriu ka theksuar se gratë në LDK janë shtyllë e fortë e vendimmarrjes dhe bartëse të proceseve të rëndësishme që kanë formësuar identitetin partiak që nga themelimi e deri në ditët e sotme.

“Sepse gratë në LDK janë, dhe gjithmonë kanë qenë, vendimmarrëse! Jemi pjesë e patjetërsueshme e identitetit partiak, që nga shtrirja e themeleve të partisë e deri sot në ndërtimin e së ardhmes,” ka deklaruar ajo, duke vënë theksin tek roli i grave si forcë e pakrahasueshme në ndryshimin që synon të sjellë LDK-ja më 9 shkurt.

-Advertisement-

Lushaku-Sadriu ka veçuar angazhimin e grave të LDK-së në fusha kyçe si arsimi, shëndetësia, drejtësia dhe ekonomia, duke theksuar se shumë iniciativa dhe procese transformuese janë udhëhequr pikërisht nga gratë e kësaj partie.

“Pa gra të fuqishme, nuk ka shtet të fuqishëm,” ka theksuar ajo, duke bërë thirrje për bashkëpunim të gjithë qytetarëve për ta çuar përpara këtë vizion të përbashkët për Kosovën.

Vizita te obelisku “Heroinat” shënon një tjetër angazhim konkret të LDK-së për fuqizimin e rolit të grave në shoqëri dhe për të nderuar trashëgiminë e tyre në historinë dhe të ardhmen e Kosovës.

Subscribe në YouTube: GAZETA INFOKUSI
UNI-Universum International College rankohet me sukses në Times Higher Education Impact Rankings 2024
-Advertisement-

Të tjera

Fokusi

lajme