Lajme

Lobuesi në ShBA, Haxhi Dauti nuk lë të “humbet” Amerika

Autori: Gazeta inFokus 20:32 | 04 August 2023

Takimet janë me personalitete të ndryshme, por kryetema e diskutimit është e njëjta. Këshilli Shqiptaro-Amerikan, që nga viti 1991, lobon për Kosovën dhe popullin e saj në Shtetet e Bashkuara të Amerikës.

“Nuk duam që të humbim miqësinë ndërmjet Amerikës dhe shqiptarëve, pasi qeveritë vijnë e shkojnë”, pohoi kryetari i Këshillit, Haxhi Dauti.

Javën e kaluar ai pati një drekë pune në Uashington me të Dërguarin e ShBA-së për Ballkanin Perëndimor, Gabriel Escobar e ish-ambasadorin William Walker. Madje, ky i fundit kishte pasur edhe një pyetje për emisarin amerikan.

-Advertisement-

“E pyeti se si është e mundur që një sllovak dhe një spanjoll të merret me çështjen e Kosovës për paqe me Serbinë. Escobar u përgjigj duke i thënë se Lajçak nuk përfaqëson Bratisllavën e as tjetri Spanjën”, bëri të ditur Dauti.

Ai tregoi se nga Escobar u ngrit shqetësimi që për zhvillimet në veri nuk pati koordinim nga ekzekutivi kosovar.

“Tha nuk jemi të kënaqur se nuk e dimë se çdo të ndodhë, çdo herë është me ndryshime, është kundër medieve, ka filluar të mbyllë media”.

E për çështjen e Klan Kosovës, KShA protestoi të mërkurën para Departamentit të Shtetit. Dauti pohoi se organizata që drejton interesohet edhe për zhvillimet në Maqedoninë e Veriut, Mal të Zi e Luginë të Preshevës.