Lajme

LDK kujton me dhimbje deputetin Kikaj

Autori: Gazeta inFokus 15:57 | 19 May 2017

Lidhja Demokratike e Kosovës, ka mbajtur një mbledhje komemorative me rastin e ndarjes nga jeta të deputetit nga kjo parti Agim Kikaj.

Kryeministri në detyrë Isa Mustafa në emër të Qeverisë së Kosovës, të LDK-së dhe në emrin e tij personal shprehu ngushëllimet me rastin e vdekjes së deputetit Kikaj.

Për deputetin Kikaj Mustafa dha vlerësimet më të larta, sipas të cilit Kosova ka humbur një njeri të kompletuar dhe një atdhetar.

-Advertisement-

Mustafa tha se Kikaj la pas vetes një biografi të jashtëzakonshme duke qenë kryetar i Podujevës, dhe deputet i LDK-së.

“Ai mbetet shëmbëlltyrë për të gjithë ne. Ai ishte dijetar që shprehej me fakte dhe argumente. Ai dominonte me modestinë e tij, ishte artikulues i pashoq i gjuhës shqipe. Kemi nevojë që çdo ditë të na agojë Agimi. Ndarja e Agim Kikajt është humbje për proceset demokratike të Kosovës. Shoqëria duhet të jetë mirënjohëse për kontributin e tij”, tha Mustafa.

Ndërsa kryetari i Podujevës Agim Veliu u shpreh se nuk mund të merrnin lajm më të trishtë sesa kumtin e zi për shkuarjen në amshim të Agim Kikajt.

“Shkuarja në amshim ishte një lajm i rëndë për familjen, për neve bashkëpunëtorët dhe për qytetarët e Podujevës dhe për LDK-në. Agim Kikaj ishte një luftëtar i paepur jo vetëm i betejave politike, por në radhë të parë të betejave njerëzore. Ishte i pathyeshëm dhe veprimtar. Nuk u thye dhe nuk e ndaloi veprimtarinë e tij as kur e burgosën, përkundrazi doli më i fortë. Është vështirë të gjesh fjalë ta përshkruash si person. Ai ishte i dashuruar i letërsisë dhe gjuhës shqipe, nuk u mjaftua vetëm me të qenurit jurist, por edhe njohës i gjuhës. Asnjëherë nuk u pajtua me realitetin e ndrydhur që e pati vendi jonë”, tha Veliu.

Në emër të familjes të pranishmit i falënderoi i biri i deputetit, Altin Kikaj duke thënë :”Babë fli i qetë, LDK-ja po fiton”.

Kikaj ka ndërruar jetë mbrëmë siç është thënë nga një sulm në zemër. Varrimi i tij do të bëhet sot në Lupq të Poshtëm të Podujevës në orën 17:00.

Subscribe në YouTube: GAZETA INFOKUSI