Lajme

Lajçak e lë pa zgjidhje Kosovën për zgjedhjet serbe, refuzon alternativat e Qeverisë Kurti

Autori: Gazeta inFokus 17:51 | 16 March 2022

Emisari special i Bashkimit Evropian për dialogun, Miroslav Lajçak, ka kërkuar nga Kosova dhe Serbia që të gjejnë një zgjidhje e cila është e pranueshme për të dyja palët, lidhur me mbajtjen e zgjedhjeve serbe të 3 prillit në Kosovë.

Për ta arritur këtë, Lajçak tha se është në kontakt të vazhdueshëm me institucionet në Kosovë dhe ato në Serbi.

Ai, tha se dita e zgjedhjeve po afrohet, andaj shumë shpejt duhet të arrihet një marrëveshje politike ndërmjet dy vendeve e cila nuk do të cenonte kushtetutshmërinë e Kosovës dhe do t’u mundësonte serbëve të Kosovës që ta ushtrojnë të drejtën e tyre për të votuar.

-Advertisement-

Madje, Lajçak thotë se një marrëveshje e tillë do të krijonte atmosferë tjetër në dialogun e nivelit të lartë politik, që sipas tij pritet të vazhdojë pas zgjedhjeve serbe.

Tutje, Lajçak tha se ligji serb nuk e mundëson votën me postë në zgjedhjet serbe, ashtu siç ka pretenduar Qeveria e Kosovës.

Po ashtu, tha se as aspekti logjistik nuk e mundëson që votimi të kryhet në një zyrë ndërlidhëse.

Kësisoj, sipas tij duhet të lejohet votimi fizik.

”Vota me postë, Ligji serb nuk e mundëson një mundësi të tillë dhe nuk mund të ndryshohet ligji që të akomodojë këtë pikë para zgjedhjeve. Së pari Zyra Ndërlidhëse, fizikisht është në kuadër të BE-së në Prishtinë. Në aspektin logjistik nuk është e mundur, sepse janë diku rreth 10 mijë serbë të regjistruar për votën në Kosovë. Të kemi 55 mijë votues në një zyrë ndërlidhëse është e pamundur”, tha Lajçak.

Sa i përket dialogut, emisari i BE-së shtoi se ky proces duhet të përshpejtohet, ndërsa theksoi se “Kosova është palë e barabartë”.

Ndërsa, i pyetur se kur pritet të përfundojë dialogu, Lajçak tha se nuk varet nga BE-ja si ndërmjetësuese, por nga Kosova dhe Serbia.

“Sa larg jemi nga normalizimi i raporteve, s’mund të them sepse varet nga të dyja palët, por ne jemi të interesuar që të përfundojë sa më shpejtë”, deklaroi ai për RTK-në.

“Normalizimi është gjithçka dhe është për Kosovën e Serbinë, ata janë pronarë të dialogut dhe ata vendosin se si të normalizohen raportet Ne jemi të gatshëm të mbështetim të dy vendet që të arrijnë në këtë pikë”.

Subscribe në YouTube: GAZETA INFOKUSI
UFC EKSKLUZIVISHT NË ARTMOTION!

Të tjera

Fokusi

lajme