Qeveria e Kosovës po planifikon një investim strategjik në veri të Kosovës. 20 vjet pas përfundimit të  luftës, ekzekutivi i vendit ka vendosur që t’ua ndërtoi shtëpitë mbi 1 mijë e 500 familjeve, të cilat u dëbuan me dhunë nga nga pjesa veriore e vendit në shkurt të vitit 2000.

Një pjesë e këtyre shtëpive të djegura e shkatërruara do të ndërtohen nga fillimi, e një pjesë tjetër do të rindërtohen varësisht nga gjendja teknike në të cilën janë, shkruan gazeta inFokus.

Kështu, gazeta inFokus ka gjetur se parashihet në buxhetin e Kosovës për vitin 2020, të miratuar javën që shkoi në Kuvendin e Kosovës.

Në këtë dokument Qeveria ka ndarë 1 milionë euro për “ndërtimin dhe rindërtimin e shtëpive të djegura në pjesën veriore të Kosovës” përmes Agjencisë Qendrore të Prokurimit ndërsa 500 mijë euro tjera po për këtë qëllim përmes Ministrisë së Infrastrukturës, shkruan gazeta inFokus.

Ky duket të jetë plani i institucioneve të vendit për normalizimin e marrëdhënieve mes komuniteteve dhe ktimin e shqiptarëve të dëbuar nga komunat veriore të Kosovës.

Këtë e pati premtuar kryeministri i Kosovës, Albin Kurti në një akademi përkujtimore në Mitrovicë,  në shkurt të këtij viti duke përkujtuar kohën kur me ç’rast grupe të armatosura serbe kishin vrarë 10 shqiptarë, plagosur 25, ndërsa dëbuar me dhunë nga pronat e tyre rreth 12 mijë shqiptarë të tjerë, shkruan gazeta inFokus.

“Ne si shtet i Kosovës dhe institucione të Republikës ju kemi shumë borxh këtyre familjarëve të cilët kanë paguar çmimin e lirisë edhe pas çlirimit, dhe njëkohësisht janë dëshmi e gjallë se plagët tona mbeten të hapura. Ne duhet të qëndrojmë e do të qëndrojmë pranë këtyre familjarëve të cilët sot kanë dhembje e pikëllim sepse i kujtojnë me shumë mall më të dashurit e tyre”, pati thënë Kurti.

Ndërkaq, kryetari i Mitrovicës, Agim Bahtiri, ishte ai që kërkoi fond të veqant për ndërtimin e shtëpive në pjesën veriore të Kosovës duke u shprehur i bindur se shqiptarët do të kthehen në atë pjesë të qytetit në numër më të madh se sa kanë qenë më herët, shkruan gazeta inFokus.

“Unë e di se tani jemi në normalizim të gjendjes dhe shqiptarët do të kthehen në pjesën e veriut në numër më shumë se sa kanë qenë. Kam para jush këtu një kërkesë të veçantë për kryeministrin që të ndajë një fond për ndërtimin e shtëpive në pjesën veriore dhe të kthehen shqiptarët ku kanë jetuar me shekuj. Ky është plotësimi i dëshirave të atyre që kanë vdekur”, pati thënë Bahtiri.

Ky veprim i Qeverisë së Kosovës duket se vjenë si kundërpërgjigje ndaj projekteve të Qeverisë së Serbisë, e cila në vitin 2016 ka vënë gur themelin për ndërtimin e lagjes me rreth 300 shtëpi në Veri të Mitrovicës i financuar nga buxheti I qeverisë së Serbisë.

Megjithëse në atë kohë dy liderët opozitar të AAK-së dhe Nismës për Kosovën, Ramush Haradinaj dhe Fatmir Limaj kërkuan që të merren masa dhe të pengohen ngjarjet e tilla në Kosovë, ky project nuk u ndërpre./gazeta inFokus/

Sponsoruar