Lajme

Ky është numri i protestuesve që morën pjesë në protestën e serbëve në veri

Autori: Gazeta inFokus 14:13 | 22 December 2022

Policia e Kosovës ka njoftuar se në protestën e mbajtur sot në Rudarë të Zvaçanit, morën pjesë rreth 1 mijë e 500 protestues, shkruan Gazeta Infokus.

Përmes një komunikatë të lëshuar për media, PK ka njoftuar se protesta në veri ka përfunduar e qetë.

“Sipas vlerësimeve në terren rreth orës 13:00, protesta ka përfunduar e qetë, pa ndonjë incident të raportuar dhe në të kanë marrë pjesë rreth 1.500 pjesëmarrës”, njofton policia.

-Advertisement-

Në këtë protestë serbët bën thirrje kundër kryeministrit, Albin Kurti dhe ambasadorit gjerman në Kosovë, Jorn Rohde.

Gjithashtu ata treguan se cilat janë kushtet për largimin e barrikadave ne këtë pjesë të Kosovës.

Lirimi i serbëve të arrestuar, tërheqja e “listave sekrete për arrestimin dhe pushkatimin e serbëve”, si dhe tërheqja e njësive speciale të Policisë së Kosovës nga veriu i Kosovës janë kushtet për heqjen e barrikadave të ngritura në këtë zonë, tha Goran Rakiq, kryetar i Listës Serbe në protestë.

Që nga 10 dhjetori rrugët kryesore në veri të Kosovës janë të bllokuara nga barrikadat. Grupe të serbëve lokalë kanë bllokuar me mjete të rënda dy rrugët kryesore që çojnë drejt vendkalimeve kufitare me Serbinë, Jarinjë dhe Bërnjak.

Përmes këtij veprimi ata i janë përgjigjur arrestimit të ish-policit serb të Policisë së Kosovës, Dejan Pantiq, i dyshuar për një sulm kundër zyrtarëve të Komisionit Qendror të Zgjedhjeve në veri./Gazeta Infokus/

Subscribe në YouTube: GAZETA INFOKUSI